FRIÛL FÛR DAL FRIÛL. Pecjis friulvenetisjulianis

Diviersis realtâts associazionistichis si son lamentadis des nestris osservazions sul Friûl fûr dal Friûl, ancje cuant che o vin fat coments positîfs, cuasit che le vessin cun cualchidun. Nuie di personâl cuintri di nissun, mancjarès!
Ma se o viodìn che alc proponût al va cuintri l’interès dal Friûl, massime se al cjape dentri i dissendents di chei Furlans che “a son stâts libars di scugnî lâ”, alore o continuarìn a permetisi di fâ presint ce che seont noaltris nol cuadre, simpri cuntun voli furlanist.
O vin viodude une copie di un progjet, previodût pal mês di Lui, dulà che i obietîfs a son la cognossince de culture “friul-veneto-giuliana” e la cognossince de lenghe taliane.
Autôr di chest progjet clamât “Young Adults 2012” al è l’Efasce (Ente Friulano Assistenza Sociale Culturale Emigranti – Pordenonesi nel Mondo).
Te descrizion dal progjet si fevele ancje de pussibilitât, pai partecipants, di cognossi realtâts produtivis economichis par un eventuâl lavôr (no savìn se tra chestis e je di meti ancje la visite al CittàFiera previodude tal program) e la riscuvierte des lidrîs storichis che a àn puartât a la emigrazion dai lôr antenâts. Su chest nuie ce dî, ma a proposit di lidrîs, no podìn no rilevâ une cierte contradizion tra storie, gjeografie e la definizion “friul-veneto-giuliana”: la regjon Friûl-Vignesie Julie e je nassude tal 1963 e buine part de emigrazion, ançje dal Friûl ocidentâl e jere stade ben prime. Duncje o podìn dî che, se si à di fevelâ di culture de emigrazion, chê e jere furlane arude.
E une considerazion ancje su la grande gole di insegnâ il talian: nissun al à voie di jessi cuintri dal insegnament dal talian ai dissendents dai emigrâts furlans, ma o savìn che a son za sogjets che a puedin fâlu (universitâts, la societât Dante Alighieri o altris ents che a son ben presints tai stâts forescj) e duncje chei ents furlans che si ocupin di programs pai dissendents dai migrants furlans a àn il dovê, almancul morâl, di permeti a cheste zoventût di cognossi la lenghe mari dai lôr vons. Isal un delit pensâle cussì? Po ben, o continuarìn a “pecjâ di furlanetât”, confuartâts ancje dal interès palesât dai zovins furlans pal mont. Che al stedi duncje trancuil Pieri Pittaro: “compagnots e gulag” no mancjaran di laudâ progjets in linie cu la difese de nestre identitât.
(viôt la recension di Blecs a pagjine 22 di cheste Patrie) ■
Redazion