Von der Leyen: Une Scozie indipendente? Parcè no

II setante agns de “Declarazion Schuman”, la domande e la dibisugne di une Europe che e sedi “plui Europe”, lis iniziativis dai citadins a pro di lenghis, minorancis e nazionalitâts e une declarazion in cont de Scozie, fate di Ursula van der Leyen. Par fortune, a nivel european no si discut e no si barufe dome di MES e Covid-19, ma al sucêt ancje alc altri.
◆ Ai 9 di Mai stâts – in ocasion dal inovâl de declarazion publiche a pro de dibisugne di inviâ in Europe un procès di integrazion politiche e economiche cun chê di fâ sù un avignî di pâs, fate in chê dì dal 1950 a Parîs de bande dal ministri francês pai afârs forescj, Robert Schuman – un pôc dapardut ancje par chest an e je stade memoreade la Fieste de Europe. La situazion particolâr, leade ae necessitât di fâi cuintri ae difusion dal gnûf coronavirus, e à condizionât une vore il davuelzisi di un grum di iniziativis par memoreâ chê Zornade, che juste chest an, in ocasion dal inovâl “taront” e denant de situazion de Europe di cumò, e à cjapât sù ancjemò plui impuartance.
Tancj events public a son deventâts dome che virtuâi, cundut achel il messaç a pro di un sburt in direzion dal disvilup di une integrazion europeane miôr al è stât mandât de bande di tancj di lôr. Se in diviersis ocasions chel messaç al è restât involuçât dentri di une retoriche “euroconformiste”, no son mancjadis posizions plui fuartis e plui dinamichis. Al è il câs dal intervent di Lorena López de Lacalle, la presidente de Aleance Libare Europeane, il partît politic che a nivel continentâl al ten dongje lis fuarcis regjonalistis e chês che a son espression di minorancis e nazionalitâts, che e à marcât che la UE dal avignî no podarà jessi compagne di chê di prime de pandemie, e che no si pues pensâ di tornâ indaûr a chê “normalitât”, ma che al covente lâ plui innà e fâ sù pardabon une Europe dai popui e dai citadins.
◆ Une domande sù par jù compagne, cuntune atenzion specifiche viers de tutele des minorancis e dal disvilup sostignibil, e je chê che a àn fat indenant i promotôrs e i firmataris de Iniziative dai citadins europeans (ICE) – daûr dal Tratât di Lisbone, e corispuint sù par jù a chê che a nivel statâl e je une propueste di leç di iniziative popolâr – a pro dal ricognossiment formâl des “regjons nazionâls”, ven a dî di chês comunitâts che a àn carateristichis linguistichis e culturâls specifichis, e de viertidure di une linie specifiche di belanç, inte suaze dai fonts pal disvilup teritoriâl, in stât di sapontâ une economie “buine” e “juste”, in armonie cu la promozion des lôr particolaritâts e cul esercizi dai dirits linguistics. Dentri de scjadince dai 7 di Mai, a son stadis tiradis dongje passe un milion di firmis, ma magari cussì no la lôr distribuzion jenfri i stâts no cuvierç il minim di siet components de UE che al covente par mandâ indenant il procès “legjislatîf”.
◆ La Comission Europeane (CE) e à capît che tal mieç de pandemie, par chê e par chês altris ICEs, nol jere par nuie facil informâ la int e tirâ dongje lis firmis, e cussì ai 19 di Mai e à fat bon un stampon di regolament che al torne a vierzi i tiermins pe sotscrizion, che in curt al varès di jessi fat bon ancje de bande dal Parlament European (PE) e dal Consei. Cheste e je une buine gnove ancje pal Minority SafePack, la ICE a pro de tutele des minorancis presentade tal 2018 di passe un milion e tresinte mil di lôr (1.128.000 lis firmis validadis): dopo dal prin incuintri tra il Comitât promotôr e la CE dai 5 di Fevrâr stâts, e vignarà in curt presentade in forme uficiâl ancje al PE.
◆ Interessant, massime pai scozês, ancje un intervent de presidente de CE, fat li dal PE ai 18 di Mai: rispuindint al eurodeputât socialist ongjarês, István Ujhelyi, che al domandave in cont des  pussibilitâts par une Scozie indipendente di jentrâ inte UE,  Ursula Von der Leyen e à dit che ducj i stâts de Europe, se a rispietin e a promovin i valôrs di fonde de UE, a puedin domandâ di deventâ membris de Union. A Londre no le àn cjapade masse ben. ❚