FRIÛL EUROPE. Presidence UE a Lituanie, mobilitazion indipendentistis in Catalogne

Il prin di Lui la Lituanie e à cjapât sù la Presidence de Union Europeane. Nol è il prin dai Stâts jentrâts te UE tal 2004 a vê il compit di rezi par sîs mês il Consei de Union, stant che lu àn za fat la Slovenie (tal 2007), la Cechie (tal 2008), la Ongjarie e la Polonie (dutis dôs tal 2011). Però cheste e je la “prime volte” par une des trê republichis baltichis che mancul di vincjecinc agns indaûr a fasevin part ancjemò de Union Sovietiche. Par chest motîf il passaç di consegnis dopo de presidence de Irlande al à vût par dut il Paîs un significât particolâr in tiermins simbolics.
Fintremai ae fin dal an, la Lituanie e varà di inmaneâ lis riunions dal Consei de UE, di rapresentâ il Consei stes cun chei altris sogjets istituzionâi, dentri e fûr de Union, e di fâ indenant propuestis operativis e argoments di discussion. Une des primis azions fatis dal guvier di Vilnius in cheste vieste e je stade la partecipazion, cul so ministri pai afârs forescj Linas Antanas Linkevicius, ae gnove riunion de taule bilaterâl di stabilizazion e associazion tra la UE e la Ex Republiche yugoslave di Macedonie.
La jentrade de Cravuazie inte Union e à dât un gnûf sburt a diviers Stâts dai Balcans a movisi in chê direzion: no dome la Macedonie, ma ancje – e soredut – la Serbie, là che il Parlament al è daûr a prontâ e a votâ une gnove risoluzion in chest sens.
La prospetive di jentrâ te UE tant che stât indipendent e je chê fate indenant ancje de bande dai indipendentiscj catalans. L’argoment, in gjenerâl e in particolâr su chest aspiet, a Bruxelles par cumò al è tabù, cemût che si à viodût za tai mês passâts. Par intant la Assemblee Nazionâl Catalane si prepare par une gnove “Diada” – i 11 di Setembar, la fieste nazionâl – cun chê di palesâ la volontât di indipendence de maiorance dai catalans. La idee e je chê di fâ une cjadene umane lungje plui o mancul 400 chilometris cuntun numar stimât di personis che al podarès lâ di 250 a 280 mil. Dopo une setemane de viertidure des iscrizions a jerin za 80 mil di lôr i partecipants ae iniziative, che e varès di slargjâsi ancje ta chei altris Paîs Catalans.
✒ Marco Stolfo