FRIÛL EUROPE. Nuie «Grexit», pocje Europe e une piçule sperance

✽✽✽ Nuie «Grexit», ma ancjemò masse pocje Europe. Il braç di fier in cont di debit e austeritât tra Comission europeane, Font monetari internazionâl, Bancje centrâl europeane, guviers statâi de Zone euro e guvier grêc al à rivât adore a sierâsi cuntun acuardi, che nol contente masse nissun di lôr, par chei che a son i siei contignûts, ma che al contente plui o mancul ducj par vie che la detule «alc al è alc e nuie al è nuie» e vâl ancje a Bruxelles, a Washington, a Francfurt, a Berlin e a Atenis.
Tes ultimis setemanis di Jugn e tes primis di Lui si àn palesât ad in plen i problemis di fonde de Europe che e je – soredut il fat che e je masse pocje – e des politichis europeanis che a mancjin.
✽✽✽ Cun di plui, e je tornade a saltâ fûr a fuart ancje une cierte propagande, miscliçade cun disinformazion e dogmnatisim, soredut in cierts ambients, su cierts mieçs di comunicazion e intal Stât talian. Dut chest si lu à viodût in ocasion dal referendum che il guvier Tsipras al à convocât ai 5 di Lui par regjistrâ la volontât popolâr in cont de propueste di acuardi fate indenant dai interlocutôrs de Grecie (e cun chê di vê plui fuarce tes gnovis tratativis, soredut cuntune vitorie dal ‘no’: chê che i leve miôr a Syriza).
✽✽✽ Tal so discors in Parlament dai 26 di Jugn, il premier grêc al veve domandât il vôt a pro dal reerendum e al veve doprât ancje peraulis di ordin tant che sovranitât, massime par vê il consens de diestre greghe, ma in nissun moment chê fate indenant dal guvier a pro dal ‘no’ e jere une posizion antieuropeiste. Propit par chel il ‘no’ al à vinçût e propit par chel, dopo dal vôt, la plui part des fuarcis politichis greghis a àn poiât il gnûf inviament des tratativis.
✽✽✽ La consultazion, però, di plui bandis e jere stade piturade tant che une sielte tra euro e dracma e a pro o cuintri de Europe ‘tout court’, no dome de bande dai media, ma ancje dai politics. Tal Stât talian lu àn fat sei Renzi, cun chê di mostrâsi il plui amion de siore Merkel, sei Salvini e il M5S, par mostrâsi e vonde. Inaltrò al à fat compagn il vicecancelîr todesc Gabriel, che al à definît il risultât dal referendum tant che la demolizion di chel ultin puint che al jere tra la Grecie e la Europe: une declarazion cence fonde juridiche e cence sens politic, cemût che si viôt cumò.
✽✽✽ Par sigûr la situazion de Grecie e reste grivie. E je compagne ancje chê di une Europe che e reste a miezis, cui Stâts che a pensin ognidun al so «particulare» e che a àn plui patît che promovût l’acuardi finâl. Cui che al salte fûr miôr di cheste situazion e je la Bancje centrâl europeane, che però di bessole no je avonde. La sperance e je chê che ducj a vedin imparade la lezion e si movin par saltâ fûr di chê dimension intergovernative che e fâs simpri plui dams. E je une sperance piçule, ma tocje tignîle e dâi fuarce: i antîcs a disevin «spes ultima dea». ❚
Marco Stolfo