Ce ise la Union Europeane: la cjase di ducj, la «unitât te diversitât» o istituzions che a somein une sorte di Congrès di Viene «2.0» cun stâts debii e prepotents, cun societâts plenis di pôris e prejudizis e cuntun marcjât unic là che i dirits civîi, politics e sociâi a van al mancul e i siôrs a son plui simpri siôrs e i puars simpri plui puarts? Domandis di cheste fate a saltin fûr simpri plui dispès e par plui resons. Cun di fat, la situazion e fâs cressi simpri di plui i dubis e i aviliments in cont dal presint e dal avignî de integrazion europeane e di chês istituzions che, in chel istès, a son il prodot e a dovaressin jessi il motôr di chel procès.
Dut chest si à palesât a fuart massime vie pai ultins mês, par esempli cul cidinôr de istituzions de Union Europeane e po cu lis lôr cjoltis di posizion in cont di ce che al jere daûr a sucedi in Catalogne. Cun dut achel, sù par jù in chei stes dîs de fin di Setembar, al è sucedût alc di diferent e di interessant, che – forsit… – al podarès dâ une scjassade positive ae Europe, ven a dî la declarazion fate di Emmanuel Macron ai 26 di Setembar li de Universitât de Sorbone, che di chê o vevin scrit juste un mês indaûr.
Di chê altre bande ancjemò la pôre de Europe, la pôre de unitât e soredut de diversitât e va dilunc a cressi ator pai Stâts europeans, cemût che al è saltât fûr tes elezions plui resintis in Gjermanie, in Austrie e te Republiche Ceche. Cence dismenteâ che, cundut de fuarce mostre de ideologjie nazionaliste che, tes sôs formis plui estremis e a clâr intolerantis compagn che in chês in aparence moderadis dal cussì clamât «patriotisim costituzionâl», in chel istès e je la fonde e il prodot dai Stâts nazionâi, propit chê vision dal mont e chê dimension politiche e istituzionâl no son in stât ni di descrivi e ni di frontâ la complessitât de realtât.
Denant di une situazion di cheste fate, cu lis sôs carateristichis e cu lis sôs contradizions, al covente fâ un sfuarç di cognossince e duncje di riflession e di cussience. Altiero Spinelli al scriveve che la Europe no cole dal cîl, ma si le fâs sù ogni dì, cun fature, cun determinazion, cun snait e duncje cul savê e cul pensâ. Une ocasion par movisi in cheste direzion e je chê che e je stade metude adun tes setemanis passadis de bande dal Centri di documentazion europeane G. Comessatti, de Universitât dal Friûl e de cooperative Informazione Friulana cul jutori de Rapresentance in Italie de Comission Europeane. La iniziative si clame ‘Europa 57/17′ e si insuaze tal progjet di rêt ’60 anni di Unione europea: sfide e prospettive per l’Europa’, cun chê di memoreâ il 60esim inovâl dai Tratâts di Rome, istitutîfs de CEE e de Euratom, di fâ cognossi il procès di integrazion europeane e lis istituzions de Union Europeane e di promovi cussì une citadinance europeane cussiente.
Dai 14 di Otubar fintremai ai prins di Novembar di chest an su lis frecuencis di Radio Onde Furlane e je stade trasmetude une serie di programs dedicâts a chescj argoments, ae Europe di îr, di vuê e di doman e ai rapuarts tra Friûl e Europe. Ai 3 di Novembar il percors inviât in modulazion di frecuence e in rêt al è lât indenant cuntun incuintri public che si à davuelt a Udin li dal Pôl economic-juridic de Universitât dal Friûl, cu la partecipazion di sù par jù cuatricent di lôr, students di un trop di scuelis superiôrs di chenti, che a àn vût la pussibilitât di discori di ideis e dirits, di storie e atualitât, di culture e oportunitâts, cun esperts di gale tant che, par esempli, Pier Virgilio Dastoli, Giorgio Grimaldi, Renato Damiani e Angelo Floramo.
Marco Stolfo
