FRIÛL EUROPE. La Europe che e dîs e che fâs. E chê che no je e che no sa ce fâ

Lu à dit la Europe. Pal plui frasis di cheste fate a vegnin dopradis de bande dai sorestants o ben di esperts e “opinion leaders” cun chê di justificâ tais ae spese publiche e politichis antisociâls e cul efiet di piturâ lis istituzions continentâls tant che entitâts economicistis e cence umanitât. Par fortune nol è simpri cussì e al sucêt ancje che de Europe al rivi un segnâl di justizie e di democrazie, in maniere coerente cun chês che a son lis fondis teorichis e lis prospetivis dal procès di integrazion europeane. Par esempli, cualchi zornade dopo di chê che cumò ancje daûr di une leç regjonâl e je la Fieste de Patrie dal Friûl, la Europe e à dit peraulis fuartis e claris in cont di une situazion là che e je saltade fûr une des musis piês dal Stât talian. Lu à fat cuntune sentence de Cort europeane dai dirits dal om, l’orghin jurisdizionâl metût adun tal 1959 cun chê di garantî il rispiet e la metude in vore de Convenzion europeane pe protezion dai dirits dal om e des libertâts fondamentâls, fate buine ancjemò tal 1950 inte suaze dal Consei de Europe.
Cun di fat, la Cort di Strasburc e à dât fûr il so judizi su ce che al è sucedût inte gnot dai 21 di Lui dal 2001 a Gjenue alì de scuele Diaz, intant dal G8, daûr dal ricors fat indenant di un citadin talian, Arnaldo Cestaro, che in chê ocasion al jere stât pestât ben e no mâl – un braç, une gjambe e dîs cuestis rotis… – de bande dai agjents di polizie che a jerin jentrâts in chel che al jere un dai sîts dal Genova Social Forum. I judiçs europeans, ae unanimitât, a àn ricognossût dutis lis resons di Cestaro, declarant che ce che i à sucedût al è une violazion dal articul 3 di chê convenzion, tant a dî che chês patidis ae Diaz a son torturis e trataments barbars e degradants. Cun di plui, te sentence al ven marcât il fat che i responsabii di chê pestadice no son stâts mai ricognossûts, no dome pes dificoltâts ogjetivis che e à vût la procure te lôr identificazion ma soredut par vie de mancjance di cooperazion de bande des fuarcis dal ordin e dal fat che lis leçs talianis no cjapin dentri a clâr e ad in plen reâts di chê fate. Chê patide di Cestaro, pe Cort di Strasburc, e je stade une agression, là che nol esist nissun rapuart di causalitât tra il so compuartament e l’ûs de fuarce de bande dai polizais, e duncje e je stade une violence gratuite, une torture: un reât che nol pues vignî lassât lâ in prescrizion.
Al è probabil che in curt a rivedin gnovis sentencis di cheste fate, stant che i judiçs europeans a àn di esprimisi in cont di almancul altris doi ricors che a tocjin lis violencis e lis umiliazions patidis di diviers di lôr alì de caserme de polizie di Bolzaneto. Par intant, a son za doi agns che il Parlament talian al è daûr a prontâ une leç su la torture, lant daûr di ce che e dîs la Europe.
Mancul mâl che e je la Europe, in chest e in altris câs che a tocjin democrazie, dirits e libertâts: par esempli, in cont de tutele des minorancis.
Magari cussì no, però, la Europe che e je no je avonde e in tancj câs si viôt a fuart propit la sô mancjance. La cuistion e je tornade a saltâ fûr a clâr dopo de enesime tragjedie tal Mâr Mediterani, chê dai 19 di Avrîl stâts. Tra i çavariaments di cui che al volarès bombardâ nâfs e barcjons, la invocazion de «solidarietât europeane» de bande di cui che par solit no i free nuie ni de Europe ni de solidarietât e la presumude competizion tra une bontât «nazionâl» e une tristerie «foreste», a restin dome i cadavars, i egoisims dai stâts e dai guviers, la pôre dal om neri e tantis lagrimis di crocodîl. Chês di une Europe che no je ancjemò ad in plen e che duncje no dîs, no fâs, no sa ce fâ o ben e riscje di fâ dams. ❚
Marco Stolfo