FRIÛL EUROPE. La cunvigne de radios comunitariis: lenghis, media e dirits a coventin pal disvilup

La Europe e clame e il Friûl al rispuint: par furlan e cun chê che e je une des sôs vôs plui vivarosis e crodibilis, chê di Radio Onde Furlane. Al è sucedût in ocasion de cunvigne dal titul “Radio broadcasting in minority languages: where we are, where we should go”, che si à davuelte a Bruxelles ai 16 e ai 17 di Otubar. Juste tal inovâl de aprovazion de prime risoluzion Arfè su la tutele des minorancis, fate buine de bande da Parlament European tal 1981, a Bruxelles si à fevelât di lenghis e di dirits linguistics, di informazion, di promozion culturâl e di radiofonie. Al incuintri, inmaneât dai eurodeputâts dal grup dai Verts/Aliance Libare Europeane e de associazion internazionâl des radios comunitariis AMARC, a jerin diviers rapresentants des emitentis comunitariis che ator pe Europe, dal Paîs Basc ae Galizie, de Irlande dal Nord ai Paîs Catalans a fasin radio intune lenghe minorizade. Tra i partecipants al jere ancje il diretôr di Onde Furlane, Mauro Missana, che al comente: «E je stade une esperience interessante: di une bande parcè che o ai cjatade une gnove conferme dal grant valôr che al à il lavôr fat de nestre radio, tant che mieç di comunicazion indipendent, par furlan e plurilengâl, che al promôf culture e dirits; di chê altre par vie che o ài discuviert che magari cussì no ancje di altris bandis a an chei stes problemis nestris, des risorsis economichis ae garanzie di frecuencis specifichis par trasmet. Si scuen lavorâ in rêt par miorâ lis robis».
Plui in gjenerâl, ancje in graciis dai intervents di Venus Jennings de UNESCO e dai europarlamentârs François Alfonsi, Iñaki Irazabaleitia, Nils Torvalds e Laszlo Tökés, inte cunvigne e à cjatât conferme la impuartance des lenghis, dai dirits linguistics e de radiofonie pe culture, pe citadinance e ancje pal disvilup socioeconomic des diversis comunitâts teritoriâls. Al è alc une vore atuâl: lu marcave za trê agns indaûr il Comitât dai podês locâi e regjonâi dal Consei de Europe e al torne a bati su chest ancje la gnove risoluzion su lis lenghis minorizadis dal Parlament European. Tan a dî: a coventin plui lenghis, plui media e plui Europe. E duncje a coventin plui Friûl e plui furlan. ❚
✒ Marco Stolfo