FRIÛL EUROPE. Elezions “autonomichis” e DisUnion Europeane

La fieste nazionâl catalane, lis elezions “autonomichis” in Galizie e te Comunitât autonome basche (CAB), la comedie dal Ream di Spagne e chê dai vertiçs intergovernatîfs europeans. Ai 11 di Setembar i catalans a son tornâts in place par memoreâ la Diada nacional, par fâ fieste, par palesâ cussience e identitât e soredut par rilançâ la cuistion de indipendence de Catalogne. A son stadis fatis manifestazions in diviersis citâts e ancje il guvier “regjonâl” di Barcelone al à cjapâ part in maniere ative e palese aes memorazions.
Il president Carles Puigdemont al à pandût a clâr la posizion sô e de maiorance che lu poie: il percors viers de indipendence al à di lâ dilunc e al è ben e al conven par ducj che Madrid e vierzi i voi e lis orelis denant di cheste prospetive. Però la rispueste de bande de capitâl dal Stât e reste simpri chê: nancje fevelâ! Cheste posizion e podarès jessi ancjemò plui fuarte tal moment che il Ream di Spagne al rivàs a vê un gnûf esecutîf vuidât dal leader dal PP, Mariano Rajoy, cu la poie  plui o mancul palese – cuntune astension o fintremai cuntun vôt a pro – almancul di une part di parlamentârs socialiscj «responsabii», in non de Patria e de Nación.
Par intant, ai 25 di Setembar si à votât pai Parlaments de Galizie e de CAB. In struc: la maiorance dai galizians (47.53%) e à confermât la sô fedeltât viers dai conservadôrs spagnoliscj dal PP, cul vôt progressit nazionalitari spartît tra la coalizion En Marea (19%) e chê dal Bloque Nacionalista Galego (BNG) (8,4%); i autonomiscj centriscj dal Partît nazionalist basc (EAJ-PNV) a restin il prin partît (37.5%), cui indipendentiscj di çampe di EH Bildu simpri seconde fuarce (21,5%, cuntun recupar di consens rispiet aes ultimis politichis); i socialiscj a van a cessecûl in ducj doi i câs, daûr di une tendince che si veve za palesade tes elezions politichis e in Catalogne; l’atensionisim al cres inte CAB e al cale in Galizie. Di une bande no son dubis in cont de creazion di un gnûf guvier vuidât dal leader dal PP, Alberto Nuñez Feijóo e di chê altre la soluzion plui probabile e je la conferme dal “lehendari” Iñigo Urkullu cu la poie dal so partît (EAJ-PNV) e dai socialiscj dal PSE.
Un altri element interessant che al salte fûr des “autonomichis” baschis al è la presince tal Parlament regjonâl di une maiorance fuartonone di sostignidôrs dal «dirit a decidi»: se si metin dongje i autonomiscj dal EAJ-PNV, i federaliscj di Elkarrekin-Podemos e i indipendentiscj di EH Bildu a son 57 (su 75) deputâts. Viodarìn ce che al nas.
Vie pal mês passât e je lade indenant ancje chê che zaromai si podarès considerâle une sorte di “telenovela” cul titul di DisUnion Europeane, par vie che la crisi di cheste Europe intergovernative, propit par vie che e je intergovernative, e somee cressi simpri di plui.
Dut chest al à vût la sô conferme in ocasion dal vertiç di Bratislava dai 16 di Setembar, là che i sorestants dai Vincjesiet – e mancjave la premier britaniche, stant che il Ream Unît al è daûr a meti in vore (cuntun grum di calme…) il percors che al varès di puartâ ae conclusion dal Brexit – a àn mostrât di jessi in cunvigne su pocjis robis: che ognidun al pense ai siei afârs, che intune forme o in chê altre ducj a àn chê di rinfuarcî il rûl dai Stâts e duncje che – cence dîlu –  la unitât de Europe e je simpri plui clopadice.
Chel incuintri e chel gnûf, fat a Berlin ai 28 dal mês, dome cul president de Comission, Jean Claude Juncker, cul president francês François Holland e cu la cancelire todescje Angela Merkel, a mostrin che la confusion e cres. A mostrin ancje che la vôs de Italie e cont pôc, cundut de retoriche (pseudo)europeiste fate indenant a Ventotene. Ma forsit a Matteo Renzi i va miôr cussì. In maniere di podê dî: «e je colpe de Europe». ❚
MARCO STOLFO