Friûl austriac, tiere di predis politics

Ai prins di Jugn si son vudis lis aministrativis pe elezion di tancj conseis comunâls furlans e sui media talians e à fat tant scjas la notizie de elezion di Andrea Bellavite, za plevan di Dael dal 1990 al 1995, che cumò, dopo vê provât a cori pe incjarie di sindic di Gurize tal 2007 e dopo de sospension a divinis, al è rivât a deventâ prin citadin dal “paîs des meridianis”.
Bellavite al è stât elet che nol è plui tal esercizi dal ministeri di cult, cuant invezit a cjaval dal Votcent e Nûfcent diviers a son stâts i predis dal Friûl imperiâl impegnâts in politiche, continuant a esercitâ lis lôr funzions religjosis. La leç taliane e dispon che «no puedin jessi elets sindic tal teritori dulà che a esercitin il lôr ufici i eclesiastics e i ministris di cult».
Invezit l’impegn politic e sociâl dal clericât furlan orientâl si fondave suntun element diferent. Nus al spieghe il storic Ferruccio Tassin «Tal Ream di Italie e jere la disposizion dal non expedit declarade tal 1874 di pape Pio IX che di fat al veve impedît ai catolics di partecipâ ae vite politiche dal gnûf stât. Il Friûl imperiâl nol veve il vincul di chei sot dai Savoia e i predis furlans di chestis bandis a viodevin te politiche un mieç par rivâ a cjapâ plui animis».
I predis a son stâts i promotôrs des primis cassis rurâls dal Friûl orientâl, ma nol bastave: «sul esempli dai predis austriacs dal Trentin, i nestris a vevin capît si veve di jentrâ li che si cjapavin lis decision: di chi l’ativisim ancje te politiche».
E i esemplis no son pôcs. Di bons. Luigi Faidutti, za parlamentâr a Viene, o vin fevelât plui voltis: tal 1895 al fondave la casse rurâl di Caprive, tal 1899 la Federazion dai consorzis agricui dal Friûl e tal 1900 la Bancje furlane deventant il so prin president. E tal 1907 al vignive elet deputât.
Ma prime di lui al jere stât elet in parlament, imponintsi propit su Faidutti, bons. Adamo Zanetti di Marian. «Al fo elet te legjislature dal 1897 al 1901, dopo che tal 1896 al veve fondade a Flumisel la casse rurâl, tal 1898 une societât bovine e tal 1899 une societât operarie» al spieghe Tassin. «Un altri al è bons. Eugenio Valussi, nassût a Talmassons, che al puartà il so impegn politic in Trentin, deventant riferiment ancje par Alcide De Gasperi”.
Tra i cussì clamâts predis sociâi impegnâts tai paîs dal Friûl orientâl o ricuardìn mons. Carlo Stacul di Migjee che al veve fondade tal 1908 la associazion Giovane Friuli cun passe 1500 fantats iscrit, e che al fo elet ae fin dal Votcent conseîr comunâl di Dael li che al jere predi e al veve fondade la casse rurâl. ❚
✒ Christian Romanini