FONDAZIONE FRIULI. Il moviment che al fâs ben

“Anziani in movimento” e larà in onde su Telefriuli par dâ continuitât aes pratichis di ativitât
motorie dedicadis ai anzians. O fevelìn dal progjet realizât de associazion “Che spettacolo” che za di cuatri agns incà al ven sostignût de Fondazione Friuli e che al è finalizât a dâ la pussibilitât aes personis anzianis sedi di savê alc di plui su lis buinis pratichis di gjinastiche, che di praticâlis.
◆ Cul rivâ de pandemie, chês ativitâts a àn vût di fermâsi, ma cumò si inmanearan trasmissions su Telefriuli par garantî la continuitât dal progjet, in spiete che si torni ae normalitât: «Scomençant di Lui e fintremai in Novembar – al conte Massimo Piubello, president de associazion “Che spettacolo” – su Telefriuli e larà in onde une trasmission di un cuart di ore, di miercus e di joibe, a la une e un cuart dopomisdì, cu lis relativis replichis. In chel cuart di ore, un espert al spiegarà varis ativitâts di gjinastiche che si puedin fâ a cjase. O vin pensât che Telefriuli nus podès judâ a mantignî vive la nestre ativitât, viodût che e je une television une vore viodude sul teritori».
◆ La associazion “Chespettacolo”, che e met adun tancj laureâts in siencis motoriis, e à tacât inmò siet agns indaûr cul so progjet che al previôt une prime fase di divulgazion – midiant depliants distribuîts tes cjasis di diviers paîs furlans –, une seconde fase cu la organizazion di un incuintri public tai locâi publics, e infin une fase pratiche di yoga e di ativitât motorie tes palestris publichis.
◆ Intun prin moment il progjet al jere sostignût de provincie di Udin, e po di cuatri agns incà al à cjatât la poie de Fondazione Friuli: «Ta chescj agns – al spieghe Piubello – o vin fat lis nestris ativitât in Comuns tant che Muimans, Pagnà, Pavie, San Lenart e Manzan: o vin seguît centenârs di personis anzianis e o sin intenzionâts a lâ indenant in graciis dai bogns risultâts che o vin vût. Cui che al è interessât al pues cjatâ informazions sul sît www.chespettacolo.info o clamâ il numar 335 389029». ❚