Autonomie come categorie spirituâl. Decimeprime pontade

E je l’ultime puntade che e siere la reflession di pre Antoni su pre Checo Placerean e in particolâr tocjant un dai aspiets di fonde de sô sielte di vite. Pre Checo al jere autonomist no par mode o par oportunisim, ma par profonde convinzion e sielte di vite. A cent agns de sô muart o podìn onorâlu soredut metint in pratiche, vivint, scombatint simpri pe dignitât, pe libertât, pe autonomie personâl e dal nestri popul.
pre Roman Michelot
O ai cirût di rapresentâ cun afiet e obietivitât, ancje se in maniere riassuntive, la figure di pre Checo tal so rapuart vitâl, esistenziâl, cu l’autonomie. Une figure che il timp le nete dai siei difiets e le fâs deventâ simpri plui sflandorose. Un om che forsit no lu vin cognossût e mertât fin dapît ma che al à onorade la nestre tiere e la nestre storie. Al è just onorâlu, studiâlu, capî e recepî il so mes, atualizantlu e rapuartantlu al nestri moment locâl, eclesiâl e globâl. Soredut al è just spartî la sô passion pe autonomie, il so gust pe libertât, la sô sielte di sacrificâ ancje la cariere par no vendi il cjâf e l’anime. O speri che la sô semence e cjati un teren ben arât e, se Diu al vûl, plui furtune di chê che e à vût cuant che lui al jere cun nô ancje cul cuarp. Al sarès il so ultin regâl, il plui splendit. Di un om libar imparìn a jessi libars, par podê no dome pretindi e batisi pe libertât e pe autonomie tal sens plui larc, ma par mertâle, gjoldile e tignîle cont come la robe plui biele e preziose de vite, anzit la condizion stesse dal vivi. Dome un libar al pò gjoldi la libertât e chest al domande fadie e lavôr interiôr incessant.
O sieri cuntune sflocje che e rint la sô idee in materie. Inte messe pai 900 agns de Patrie dal Friûl, sul palc de place di Aquilee, al à dit: “Se pes orelis di cualchidun la peraule autonomie e je masse fuarte, si contentìn ancje de indipendence!”. E une volte, tornant da l’Austrie, là che e jere nassude une des sôs cuatri o cinc nonis (lis vin contadis par ordin che lui nus int fevelave), al finançot che i domandave se nol veve propit nuie di diclarâ, al à rispuindût: “Personalmente non ho niente da dichiarare ma, se proprio insiste, dichiaro guerra all’Italia!”. Ancje chest al è un mût di jessi vîfs, alternatîfs, libars. ❚