Fâs sù ancje tu il Mac di Sant Zuan. Tra lis cerimoniis dal solstizi di Istât, la fieste di Sant Zuan e je tra lis plui antighis

Ai 24 di Jugn, la dì di Sant Zuan, di buine matine in Cjargne la int e baline pai cjamps a cjapâ sù rosis. Une usance antighe, leade aes cerimoniis dal solstizi di Istât. Daspò, a jespui, in glesie si fâs benedî i macs ornâts di tancj colôrs e savôrs. Tornâts a cjase, ognidun al picje il so mac benedet in tal puest che i ven destinât, in gjenar tal solâr, par brusâlu tal câs che il trist timp al menaci la campagne. A son secui che si rinove cheste pratiche, ancje se a son simpri mancul chei che si cjatin di prime ore sui prâts a condividi cheste esperience, miscliçade a une dimension tra il sacri e il profan. Rît di divignince indoeuropeane e celtiche, leât aes fuarcis dal fûc, dal soreli, de aghe, de tiere e des jerbis, la usance e je stade assorbide de glesie latine che e à cjapât a simbul la rosade dai cjamps tant che aghe benedete dal batisim di Sant Zuan.
La sielte des jerbis e des rosis e je fondamentâl par vê un bon mac, che al funzioni cuintri disgraciis, maliis e malatiis di ogni sorte. Jerbis medisinâls, flôrs aromatics, come un ram di felet, sparc di mont, la rose di Sant Zuan, cumin, rude, malve, savût e cetantis altris plantis. Un tic al reste tal mac, il rest si lu dopre par tisanis, vuelis, balsims, par curâ il mâl di stomi, i gnerfs, lis scotaduris, i dincj, fintremai i dispiets dai sbilfs e la tristerie des striis.
O volìn rievocâ cheste usance cu lis peraulis di Pasolini, imagjinant un mont salvadi e pûr, cul desideri che al torni: «Li fantatis a van crotis ta l’ort, / la luna di San Zuan a li monda. / Sot dal milussâr a si pognin crotis / vuardant li stelis spierdudis e il nûl». E un libri: Il Mac di San Zuan a Cercivento. Piante e fiori tra magia, sacralità e terapia popolare di Domenico Molfetta. ❚
_______
La lungje gnot des plêfs in Cjargne, tra musiche, art e cusine cu lis jerbis
La seconde edizion de rassegne di musiche corâl La lungje gnot des plêfs in Cjargne, in programe ai 25 e 26 di Jugn tes dîs plêfs storichis des foraniis cjargnelis, e met dongje di dîs concierts, dîs degustazions di plats cu lis jerbis di stagjon. Si met duncje insiemi la storie rapresentade de bielece e unicitât des plêfs cu la musiche corâl – de polifonie antighe ae contemporanie, dai cjants cults ai popolârs – e la tradizion de cusine cjargnele di stagjon.
Ai visitadôrs ur sarà cussì regalade une esperience uniche e multisensoriâl, pai voi, pe bocje e pes orelis. Tra i côrs ospits, il Côr de Cjamare Sloven, il Côr Polifonic di Rude, il Côr dal Friûl Vignesie Julie e la Orchestre di Sant Marc, Il Côr Panarie di Dartigne, La Reverdie e altris. Tra i plats, preparâts dal consorzi di ristoradôrs cjargnei riunîts inte clape Gusto Carnia: gnocs di patatis riplens di jerbis, i cjarsons cu la mente, la fritule di prât suntun jet di cerfuei e tantis altris bontâts a km zero. ❚
✒ Alessio Screm