EDITORIÂL – Une tace di aghe minerâl cemût che si cîr di taponâ la identitât

✽✽ Al somee strani, ma si pues scomençâ de taule, dal gustâ, par rivâ a comprometi la percezion, la concezion di Friûl.
Agns indaûr e je sucedude une robe compagne pal vin. Cualchidun al veve decidût di tirâ vie la denominazion dal doc furlan, par cambiâle cuntun gjeneric e bausâr “Friuli Venezia Giulia”. Butade vie duncje une campagne promozionâl, chê di “Un vigneto chiamato Friuli”, cjalade cuntune vore di atenzion de bande dal marcjât internazionâl e considerade vincente di ducj i tecnics de comunicazion. Un autogol.
✽✽ Chê altre dì e je tocjade a di une altre robe di bevi, ancje se di un altri savôr, ma di impuartance economiche che e cres simpri di plui: la aghe cu lis bufulis. “Goccia di Carnia” e puartarà su lis butiliis il logo de Regjon.
✽✽ In sumis, tal setôr alimentâr, i prodots “tipics furlans” no àn di jessi plui individuâts in cheste maniere, ma intune divignince regjonâl che si clame apont Friûl Vignesie Julie.
Ce che no si rive a fâ tal cjâf de int, si prove a metilu in bocje.
Ma parcè movisi in cheste maniere, contrarie a cualsisedi considerazion di marcjât e di marketing?
✽✽ Isal forsit plui impuartant cirî di inmaneâ cheste muse regjonâl dal risultât concret? Al somearès di sì, se par esempli o cjalìn une altre cuistion. Il câs di Sapade. O cjatais dute la storie in chest numar, ma secont me al è impuartant segnâ un passaç: i sorestants regjonâi, che si movin sflacjôs e cun tante prudence su la cuistion dal so tornâ dongje al Friûl, àno fat il calcul di trops torneconts che a podaressin vignî a noaltris pe economie, pal turisim, pal sport?
✽✽ Ancje chi, la “ideologjie” regjonaliste e ven prime di dut: la domande dai sapadins di tornâ in Friûl e vûl dî ricognossi il Friûl, tant che une identitât ben precise e storiche, che no je chê de regjon cun Triest.
✽✽ La liste di chestis impostazions e je lungje, a scomençâ des sedis universitariis, ma al è destinât a cressi e al tocjarà, cu la scuse dai bêçs che no son, dutis lis formis di agregazion sociâl e teritoriâl che i furlans si son dâts tal ultin secul.
A falin, par malefede o par ignorance, e no fasin nancje il ben de Regjon. A stan dentri di une logjiche che no puarte disvilup reâl, che no libere energjiis, ma invezit assistenzialisim.
Cjapait la propueste dal redit di citadinance. No ise forsit la forme piês par introdusi chest mût di pensâ: “no soi jo che o ai di movimi, ma il stât, in chest câs la Regjon, che e à di judâmi”?
✽✽ Al vûl dî sburtâ la nestre zoventût viers un mût di pensâ contrari a dut ce che nus è stât insegnât di simpri. No è plui il lavôr la fonde dal nestri jessi, ma la “paiute” dai sorestants, par no fâ nuie.
✽✽ Cjalaitsi ator, no saressin tantis lis oparis di meti in vore: ambient, sigurece, traspuarts, turisim a domandin dome di jessi judâts, di vê int che e puedi meti man a sistemâ lis robis.
✽✽ Alore nol è un assegn, no je une targhete suntune butilie, nol è scancelant la peraule “furlan” dapardut che si fasin i interès di cheste Regjon. Al vûl altri. Chê braùre che dome il ricognossisi popul e comunitât, e pues dâ fûr.
Dree Valcic