EDITORIÂL – Prin di Mai dal 2017: fieste dai… no impleâts

I dâts dal mont dal lavôr a esprimin doi aspiets grâfs: la grande cuantitât di “lavôr no doprât” de nestre economie regjonâl, e la valence sociâl negative di cheste potenzialitât straçade.
_Intal 2007, an precrisi, la cuantitât di “lavôr no doprât” in F-VJ e jere di 44.500 unitâts.
Intal 2015 i lavoradôrs no impleâts a son stâts ben 95.500: 43.102 disocupâts, 39.447 discoragjâts e 13.018 “sospindûts”. Masse, pe tignude de coesion sociâl. La economie dal Friûl-Vignesie Julie, intal 2015, no à doprât il 16,5% dal lavôr disponibil tal complès, ven a stâi une persone ogni sîs!
_Il lavôr no doprât al riscje, intal timp, di trasformâ i sogjets coinvolts in personis in grant pericul di puaretât e di metiju in situazions di deprivazion materiâl, tant che a testemonein lis desenis di miârs di bisugnôs assistûts dal Banc Alimentâr e di chês altris associazions di volontariât.
_La crisi, dal 2008 al 2015, e à fat pierdi plui o mancul 23.000 ocupâts. Il dât plui negatîf tra lis regjons dal Nord Italie.
_Intal ultin bieni in Italie e je stade une cressite ocupazionâl lizere che no à rivuardât, però, la nestre regjon. La crisi e à falcidiât il lavôr soredut di une vore di zovins, cussì come che intal rest dal paîs, e a son stâts “stratignûts” al lavôr, invezit, lavoradôrs madûrs e anzians. Dal 2008 al 2015 a son stâts pierdûts cuasi 50.000 puescj di vore tra chei une vore zovins e tra i zovins.
_Il pericul al è che la espulsion dal marcjât dal lavôr si trasformi par chescj in esclusion sociâl, margjinalitât e esodi, cence podê tornâ indaûr. Il teme centrâl al è e al sarà chel dal lavôr, dai zovins in mût particolâr. Pal Friûl ancjemò di plui, calcolât l’impuariment demografic, il scjampâ tal forest dai nestris zovins e l’arest dai flus migratoris. Movìnsi cun urgjence cun politichis ativis dal lavôr incisivis, par mantignî un nivel dignitôs di benstâ e di coesion sociâl.
_E nol va dismenteât che in Friûl e je une vere vocazion e culture dal lavôr, ancje dai zovins. No si sclarirès, intune altre maniere, il parcè che a fasin masse dispès, se lu cjatin, un lavôr precari, sot paiât e cence prospetivis.
_Pal lavôr e covente une economie che e funzioni ben. Lis impresis par podê competi a inovaran procès e prodots (industrie 4.0) e chest nol crearà, in tiermins di cuantitât, gnûf lavôr, ma lu trasformarà une vore. Il lavôr, in definitive, nol cressarà in proporzion ae produtivitât dai robots, anzit.
_Si imponin, duncje, gnovis concezions e visions dal lavôr e gnovis modalitâts di redistribuzion de ricjece produsude. ❚
✒ Roberto Muradore