EDITORIÂL – La bataie di Siore Paule

✽✽ Tant par scomençâ, il 2014 al sarà un an di visâsi pes minorancis, cu la pussibilitât di pandi a dut il mont che invezit a son maiorance tai lôr paîs. O ai propit voie di vierzi chest articul cu la buine gnove dai referendum pe indipendence in Catalogne e in Scozie. Cualsidei che al sei il risultât, e sarà une vitorie par chei popui, ma ancje par ducj noaltris che o lotìn pai dirits e pe autonomie dal Friûl. No sin di bessôi in cheste bataie. Se a son rivâts lôr, o podìn rivâ ancje noaltris. O pensi no tant ae Catalogne, une vore indenant di simpri su la cuistion, ma pluitost ae Scozie che e à tornât a discuvierzi la sô muse, la sô lenghe, dome di cualchi deceni. «Tu ti consolis cun lôr», al podarès rispuindimi cualchidun. E forsit e je vere, ma nol è un mâl viodi lis robis ancje in positîf. Di sigûr, se o cjalìn a cjase nestre, la situazion e je grivie, ma chest lu savìn. Ancjemò di plui se o pensìn che o sin ancje nô furlans che o metìn man a creâ chest sisteme di suditance.
✽✽ La cuistion des Latariis Furlanis no je dome un gno balin, ma la dimostrazion concrete di cheste realtât. Se e je vere che daûr de Granarolo si movin interès economics e politics des cooperativis talianis, al è parimentri sigûr che i grups dirigjents di Latariis a son furlans, e che no ur free nuie dai arlevadôrs, furlans, de filiere dal lat, furlan, dal valôr de peraule Friûl sul marcjât. A chei furlans, di anagrafe e no di cûr, ur interesse dome la lôr cjadree tal consei di aministrazion. Nomenâts de politiche, a resonin pe lôr sachete, pal lôr tornecont.
Nol esist plui di nissune bande, tra i sorestants, il movisi pal interès dal popul furlan, pal so doman, cuntune vision strategjiche. E la politiche, i partîts, no puartin dome la responsabilitât di nomenâ i lôr pipinots a cjâf di consorzis, bancjis, istituzions, ma chê, plui serie, di pensâ dome a tornâ a fâsi elezi e di lâ daûr des diretivis di Rome o di Milan.
✽✽ No ise forsit cussì, cumò cu la Serracchiani e îr cun Tondo? Mai che e vegni fûr une idee, un alc di specific pe nestre tiere, simpri sfracaiade jenfri lis prioritâts talianis e la supierbie triestine.
✽✽ Ma o torni a dîlu: a son robis che o savìn. Plui impuartant al è cemût rispuindi a cheste logjiche autoritarie di une bande e di diletants di chê altre.
✽✽ Sù po! No fasarìn il referendum pe indipendence chest an, ma cjapâ sù cjarte e pene par dî che no sin dacuardi che il nestri lat furlan al finissi in Emilie, dome pal interès des multinazionâls, chel sì. Un graciis duncje a chê siore di Udin, Paule Pino Vianello, une ex professore, che di bessole e à tirât sù lis firmis tra lis sôs amiis, tes buteghis dal borc, da la paruchiere, par dî di no a cheste vergogne. E je lade sui gjornâi: in tancj a àn dite che e veve reson, le àn judade.
✽✽ Se lis Latariis a restaran in Friûl, il toc di mert plui impuartant par nô al è chel di siore Paule.
Dree Valcic