EDITORIÂL – Cjalìn indenant viers la Europe

✽✽ L’ultin ton al rive de Coopca, la storiche cooperative cjargnele che e riscje il faliment e di no tornâ indaûr i sparagns depositâts di tante int a so non.
Cualchidun al scrîf che cheste e je le dimostrazion de fin dal “fasìn di bessôi”, ven a stâi che un model di svilup furlan nol pues esisti o che al è condanât de logjiche de globalizazion.
✽✽ Cheste teorie no e je vere. La cuistion e je invezit cuale che e je la clape dirigjente dal Friûl e lis sôs sieltis.
✽✽ Restìn tal cumierç: cui, se no la Regjon, aial dât vie libere ae nassite dal Outlet di Palme, al Tiare di Vilès o, plui in piçul – e nus ven di ridi sul piçul – a ducj chei centris comerciâi ator pal teritori furlan? E vie ciment su la tiere, vie lis buteghis di paîs e, tant che o sin, vie ancje lis scuelutis, lis ediculis, lis puestis.
✽✽ Se al fos pussibil, la politiche regjonâl, di çampe o di diestre al è compagn, e metarès adun dut in cuatri o cinc comprensoris. E cjalait che la riforme dai ents locâi e va in chê direzion. Il rest? Chês realtât dai nestris paîs, di chei che ancjemò a tegnin dûr, che a restin a presidi de mont, de culine, dai cjamps, ce fin àno di fâ? In non e par cont dal sparagn e de modernitât dome une robe: sfantâsi.
✽✽ Po dopo, si metin a vaî pes plenis dai flums, e pes franis, e e rive la litanie: «Al mancje l’om che al tegni di cont il teritori». Fals e jesuitis.
✽✽”Di bessôi” al vûl dî che dome une classe politiche e dirigjenziâl leade a plen cul so popul, cu la sô storie, e pues pensâ al doman in mût propositîf, util e onest. «Cui isal chel pari che, se so fi i domande un pan, i darà un clap, se i domande un pes i darà un sarpint» al è scrit tal Vanzeli. Cussì al dovarès jessi ancje pai nestris sorestants e no invezit cjalâ dome al partît o ae sachete.
Di front ae crisi, il Friûl al domande clarece e no si fide masse des promessis. O crôt che no sedi dome une cuistion di bêçs, ma di democrazie.
✽✽ Par lâ indenant al vûl savût viers dulà che o nin: une code pierdude di un sisteme Italie simpri plui disastrât o il centri di une gnove Europe che e pense e che e dopre il so cjâf par tirâsi fûr dal pantan?
Vuê o vin une politiche regjonâl pleade al prin aspiet, pal secont si à di movisi di corse.
✽✽ Prime che al sedi masse tart parcè che, cemût che al à dit Sergio Cecotti al laboratori di autonomie di Merêt, i timps a corin svelts: te Europe de fin dal Stât-Nazion, di une bande al è il gnûf centralisim di Marine Le Pen, di chê altre l’ideâl de Scozie e de Catalogne.
✽✽ Daûr di un sondaç di Repubblica, plui dal 60% dai furlans al è pe indipendence dal stât talian.
Cheste e je la verifiche di un umôr de nestre int, ma cussì al covente pôc e nuie, se no devente cussience e responsabilitât.
“La Patrie” e sarà un imprest di cheste volontât ancje tal prossim an e fin cuant che al coventarà. ❚
Dree Valcic