Sfuei Mensîl Furlan Indipendent
Archivi de Patrie

1914-2014 CUINTRISTORIE DE GRANDE VUERE. Dignitât di un Popul

Agnul Floramo

La nestre “cuintristorie” de prime vuere mondiâl. Une grande tragjedie che e à puartade la muart di tante puare int, e che in Friûl e à metût furlans cuintri furlans in non di decisions cjapadis parsore dal lôr cjâf. O contìn lis storiis che la retoriche dai Stâts nazionâi no à mai contât. (10e pontade)✒ Redazion

Imperadôr Carli I di Austrie intun dissen di Giovanni Di Lena

Ai 25 di Otubar dal 1918 Viene, la capitâl dal grant Imperi, e je sflandorose di colôrs: ros, zâl, maron. Chel che si clame un autun dorât. Un aiar che al beche e che al gjave vie i pinsîrs, al jemple i polmons di vite gnove. La grande burascje che par cinc agns e à massacrade la Europe, striçant dentri popui e nazions, e sta par finî cul bot. L’Imperi al sta par murî. Nuie al sarà plui come prime, di chi a cualchi zornade. E l’Imperadôr Carli I, che al regne dal 1916, cjapant su di se chê corone che il vecjo Franz Josef al tignive dal 1948, al à a pene convocade la ultime grande assemblee di ducj i popui sogjets ai Asburcs. Al è convint tal profont che la intuizion di Franz Ferdinand, copât cuatri agns prime a Sarajevo, e jere juste: bisugnave scometi su di un Imperi dai Popui, une federazion di nazions fondade su lis identitâts nazionâls, tal rispiet de storie, de culture, de lenghe e des tradizions di Boems, Slovens, Cravuats, Serps, Ongjarês, Furlans… Furlans? Ma sigûr. Che i Asburcs no jerin mighe i Savoie! A stevin une vore atents a rispietâ lis esigjencis dai teritoris che di secui a ubidivin ae lôr famee. Daspò Cjaurêt, tal 1917, in dutis lis contradis dal Imperi il ferment al fo pardabon impuartant par trasformâ la monarchie in alc di plui gnûf, une confederazion di popui fradis, ognidun cui siei rapresentants a Viene e ognidun cul dirit di gjoldi di une autonomie che e salvàs la sô dignitât culturâl e storiche, come che al dimostre in maniere splendide il storic François Fejtó tal so libri  “Requiem per un impero defunto (Milano 1990)”. E cussì ancje doi deputâts furlans, Josef Bugat e Luîs Faidut, a tacarin une ativitât politiche intense par rivâ a otignî tal sen imperiâl la autonomie politiche dal Friûl. Josef Bugat, nassût a Zare tal 1873 di pari origjinari di Dael, si jere laureât in leç inte universitât di Graz. Elet deputât al parlament di Viene tal 1907 pal partît catolic popolâr furlan, al jere un sostignidôr ferbint de autodeterminazion dal Friûl e dai furlans. Faidut, nassût a Sant Leonart tal 1861, predi, si jere laureât in Teologjie a Viene. Cristian sociâl, al veve tacade une bataie convinte a pro dai contadins furlans e slovens, par tutelâ i lôr dirits a jessi considerâts nazions di lenghe, culture e civiltât. Ducj i doi chescj oms pardabon iluminâts a fasevin part di chel Consei nazionâl furlan che, istituît par volontât di une fuarte base popolâr, al crodeve in maniere profonde tai ideâi di Carli I, e ju sostignive cun braùre, scombatint cuintri i nazionaliscj talians, i iredentiscj, che bielzà ju clamavin traditôrs, austriacants, fanatics di une reson che no varès mai vût di viodi sperance di jessi realizade. Il lôr lavôr, la lôr passion politiche e la lôr lealtât al popul furlan a podin jessi studiâts tal libri che Bugat al fasè publicâ a Viene tal 1919 e che al à come titul “L’attività del Partito cattolico popolare friulano negli ultimi venticinque anni (1894-1918)”, libri che al à vude une biele ristampe tal 1990. Cemût che e je lade a finîle lu savìn ducj, e la Storie e je la custode uficiâl dal lôr impegn pe realizazion di un sium che al someave cussì tant dongje di realizâsi che cuasi tu lu podevis tocjâ cu la man. La Austrie, ai 4 di Novembar dal 1918 e capitolave, sfantant l’ultin imperi di Europe. I nazionaliscj si saressin svindicâts par ben, imponint sot de bandiere taliane une lenghe, une culture e une snazionalizazion feroce di ogni culture che no fos chê taliane. In primis, chê furlane. Ricuardant, ogni 4 di Novembar, cui decorâts, lis bandieris, lis monturis e lis paradis, che la grande bufule de vergogne no sarès mai stade pandude a di nissun, anzit, che la varessin fate passâ par une imprese corâl, di popul. La Italie e nasseve tai fossâi des trinceis, cui siei fîs che no domandavin altri che di podê murî pal Re, pe Patrie (dome une, chê stabilide dai confins dal stât e presidiade dai siei soldâts). Cent agns fa, come cumò. Però la Storie e je ancje buine di vê memorie, par chei che a son bogns di sgarfâ fûr la veretâta sepulide sot di un monument funerari fat di retoriche e di conivence inteletuâl. E cussì, lis peraulis che Josef Bugat al à pronunziât in chei 25 di Otubar dal 1918 a Viene, no son ladis pierdudis. Forsit l’aiarin fresc che al sborfave in chê zornade lis à puartadis di rive jù, tes nestris valadis, e vie pe plane, fin dentri la cussience di ogni bon furlan. Che magari no lis à mai imparadis a scuele (e cui mai aial contât nuie, ai nestris students, di Burigat e di Faidut?). Devant di un Parlament che in curt al sarès stât dispierdût, devant di ducj i popui da la Europe, de gjernazie latine, slave, ongjarese e todescje, Bugat al concludeve: “Se ducj nus bandonin, nus judarìn bessôi. Dio che fedi il rest. No uarìn che nissun disponi di nô, sensa di nô”. Plui che un concet, une promesse! ❚

Angelo Floramo

Fondazione Friuli / Un jutori concret al mont de scuele in regjon

Piero Cargnelutti
La Fondazione Friuli e comuniche di vê dât fûr il bant dedicât ae istruzion che al podarà contâ suntun font di 600 mil euros e che i progjets si podaran presentâ dentri dai 24 di Març. Il bant al previôt diviers indreçaments tant che il sostegn ae dotazion tecnologjiche, il potenziament des competencis linguistichis, il […] lei di plui +

Gnovis / Diego Navarria al vinç il Premi internazionâl Jacum dai Zeis

Redazion
Il nestri colaboradôr Diego Navarria al à vinçût il Premi internazionâl Jacum dai Zeis cun la conte par furlan “La confession”, insiemit a Rosella Soranzo di Duin cun “Una coppia in incognito”. Il premi al è ideât dal setemanâl Il Friuli in ocasion dai cent agns de muart dal inomenât personaç furlan, e oragnizât in colaborazion cu la Societât Filologjiche Furlane e l’Universitât […] lei di plui +

Pan e salam / Scufiots e trisculis

Enos Costantin
Une roste furlane prime de montane La disfide di BarletePar Marine Le Pen a vegnin prime i francês, par Matteo Salvini a vegnin prime i talians, par Viktor Orbán a vegnin prime i ongjarês.◆ Po ben, par finîle cun cheste naine fasìn une biele disfide. Ju puartìn jù a Barlete ducj i trê, ju sierìn […] lei di plui +