EDITORIÂL – Chei che a sburtin par mandânus in B

✽✽ Mi someave biel tacâ chest numar cuntune gnove positive, tant par fâ viodi che i furlans no son simpri “bastians contraris”. O volevi scrivi di chei zovins che a àn trasformât il drone, un strument di vuere e muart, intun alc di diviers: tal lôr progjet, bielzà vendût e in vore, al semene un antiparassitari cuintri lis malatiis de blave.
✽✽ Un esempli di alc che al larès sburtât par creâ puescj di vore, ma no dome. Un segnâl che jessi alternatîfs no je une peraule o une mode, che la nestre zoventût no je di butâ vie, che a son lis fuarcis par dâ rispuestis fuartis a cheste crisi cence fin.
In sumis mi someave che une piçule storie e podeve jessi un stimul a fâ ben, a no molâ.
✽✽ O jeri content ancje parcè che alc si è mot sul plan de politiche. E je di chê altre dì la riunion de Associazion Friûl Europe che e clame a “une mobilitazion dal popul furlan in difese de autonomie”. A Otubar si met dongje il referendum digjitâl pe Indipendence dal Friûl. No jentri su lis carateristichis e lis propuestis dai doi grops. Sul referendum o crodìn, tant che redazion de Patrie, che e sedi juste prime di dut la informazion e chest o fasarìn tal numar che al ven, sintint i promotôrs de iniziative.
✽✽ Ancje suntun altri versant si podeve segnâ un pont. Dutis lis celebrazions pal centenari de prime vuere mondiâl no passin cence une critiche che e cres dì par dì. Cuant o vin dite, te conference stampe pal gnûf an, che il nestri gjornâl al sarès stât in prime linie cuintri de retoriche, lis bausiis e lis straçariis su lis manifestazions talianotis de Regjon, si jere di bessôi: vuê o sin un grum di plui. E se il Pape al larà no dome a Redipulie, ma ancje tal cimitieri dai soldâts dal Imperi austroongjarês di Foian, di sigûr nol sarà par merit nestri, ma o sin contents istès.
✽✽ E alore parcè chel “mi someave” des primis riis? Parcè laraio indevant intune altre maniere? Dome parcè che chei altris, chei cuintri dal Friûl e dai furlans no stan fers, a sburtin par fânus finî in serie B.
E lu fasin cence nissune vergogne.
L’ultin esempli: si visaiso de Serracchiani a proposit dal ufici scolastic regjonâl. «No si tocje – e veve dite la presidente – i va de nestre autonomie»
✽✽ E dutis lis nainis su la impuartance de culture e de scuele?
Il risultât: a Setembar chel ufici al varà un dirigjent di secont nivel, al sarà ridusût, al contarà pôc e nuie. Cui aial decidût? Il guvier naturalmentri, cui nestris politicons cidins tant che simpri, includude la Serracchiani.
✽✽ Par noaltris autonomie al vûl dî fâ lis robis miôr di chei altris pe nestre int, la nestre tiere; pai sorestants e je dome un patacon par fâ cariere. ❚
DREE VALCIC