E sarà ladine la edizion 2013 di Suns: la selezion dal Liet Internazional, festival european de cjançon in lenghe minoritarie, si davuelzarà in Val di Fasse ai 9 di Novembar

La edizion 2013 di Suns, la selezion taliane e alpine dal Liet International, Festival internazionâl de cjançon in lenghe di minorance, si tignarà a Moena, te ladine Val di Fasse, ai 9 di Novembar 2013.
La notizie e je stade uficializade te sere dai 23 di Mai li de sede de locâl associazion di culture e musiche “La Grenz”, che e organizarà adun cul Servizi Minorancis Linguistichis de Provincie autonome di Trent, cjapant sù i aspiets tecnics e artistics.
Il testemoni al è stât passât par chest an dal Friûl tes mans dai ladins, ma la Arlef e Radio Onde Furlane, fuartis di une esperience di plui agns, a àn sigurât la lôr poie.
A garantî il bon risultât de manifestazion musicâl a saran ancje une schirie di ents tant che la Aziende di Promozion Turistiche de Val di Fasse e il Comun di Moena pai aspiets logjistics, e il gjornâl La Usc di Ladins, il Comune General de Fascia, l’Istitut Cultural Ladin e la Uniun Cjantauturs Ladins pal coinvoziment di dut il teritori ladin dolomitic.
A Moena ai 23 di Mai passât, oltri che ai rapresentants istituzionâi che a àn marcât la impuartance dal event e la oportunitât che al rapresente pe comunitât ladine trentine, doi ospits furlans a àn testemoneât la impuartance des produzions musicâls in lenghe di minorance pal disvilup e il status des lenghis stessis: Marco Stolfo e Lino Straulino.
Il prin al à ufiert une panoramiche de vitalitât de musiche furlane e di altris minorancis talianis e europeanis, ilustradis tal so libri “La mê lenghe e sune il rock e no dome chel”. Lino Straulino, za vincidôr di Suns e finalist dal Liet International 2009, al à compagnade la serade cuntune lezion conciert su la evoluzion de musiche furlane de tradizion ae modernitât, marcant il valôr di une produzion musicâl, che ancje trasformantsi, e rive a conservâ “la anime dal teritori”. ❚
✒ Redazion