La cuantitât dai uciei di prât e di cjamp in Austrie si è sù par jù smiezade intai ultins 24 agns, stant a ce che al comparìs sul Farmland Bird Index 2022. In plui des speciis in pericul di agns, si àn intravignudis ancjemò altris diminuzions. La stime fate su incarghe dal Ministeri de Agriculture regjonâl e je rivade ae conclusion che la cuantitât dai uciei di prât e di cjamp – misurade su la fonde di 23 speciis indicadoris di volatii – e je ai minims storics. La cause e je intune stagjon di cove une vore brute, par vie dai events atmosferics contraris. Stant ae organizazion pe protezion dai animâi, il 47,4 % dai uciei dal paisaç rurâl locâl al è disparît dal 1998. Vincj su vincjetrê speciis indicadoris a son caladis a pet dal an di prime, e nome trê speciis indicadoris a son in incressite.
◆ Ancje su la tindince su timps luncs a àn la miôr lis riduzions di cuantitât a dreture di 15 speciis indicadoris. A jessi cjapât dentri al sarès soredut il sdarnali (Embariza calandra), une specie pôc scjassose, che cuntune decressite dal 95% al è aromai stazât tant che in pericul di estinzion.
◆ Chest al dimostre che a coventaressin plui sfuarçs par salvâ lis speciis volatilis locâls. La pierdite struturâl e l’impuariment de biodiversitât dal ambient rurâl, l’ûs di pesticidis e il sfrutament agrari intensîf dai ultins dîs agns a varessin lassât olmis che no si puedin scancelâ. Birdlife al fâs riferiment ancje al gnûf program agroambientâl, là che a vegnin domandadis plui areis di conservazion naturâl a pet dal program di prin, robe che e podarès vê un efiet positîf cu lâ dal timp. ❚
Disparide la metât di ducj i uciei in Austrie intai ultins 24 agns
Barbara Cinausero
