Di «Halloween» tornant a la «Gnot dai muarts», forsit si tornarà plui furlans

Di cualchi an in ca, ancje il Friûl al à a ce fâ cun la invasion de fieste di Halloween, une sorte di Carnevâl di Novembar: e je la fieste dai muarts di divignince USA che cumò e à concuistât a plen ancje la Vecje Europe, la Italie e, magari cussì no, il Friûl. Fin a uns 20 agns fa si cjalavile tant che une des tantis matetâts di di là de Grande Aghe e invezit cumò si fâs ancje chenti, adiriture tes scuelis.
La divignince de fieste e je europeane, plui di precîs celtiche, di cuant che inte Europe precristiane pes popolazions, che si basavin prin di dut su la agriculture pe sorevivence, l’an gnûf al scomençave il 1° Novembar e la gnot dai 31 Di Otubar si faseve la fin dal Istât, là che i mortâi i disevin graciis ai spirts pes racueltis estivis.
A chei timps e jere crodince che inte gnot di fin Istât lis barieris tra il mont dai vîfs e chel dai spirts si sutiliassin tant di permeti a chescj di tornâ su la tiere.
Di ca, al ven l’ûs di lassâ devant des puartis des abitazions dai bombons, di mût di ingraciâsi lis animis dai muarts, o di picjâ ferâi rigjavâts intes cocis, par vuidâ il cjamin di cui che ju veve lassâts.
A chês lidrîs ancje in Friûl e lave la mularie di cualchi deceni fa, cuant che e costruive la muart di cavoce, lis cocis intaiadis cu la cjandele dentri (a Dimpeç, dome par dî un lûc, si fâs la fieste La not dalis muars, apont). Intai ultins timps, vie che e va indevant la invasion di Halloween, si tache fasii cuintri tornant a chei vecjos leams dismenteâts, ricjapant in plui paîs la fieste de Gnot dai muarts. Nol è mai un mâl che nol sedi un ben, si podarès dî, se cun la scuse de fieste merecane o tornassin a jessi plui furlans. ❚
✒ Dree Venier