In spiete dai prins proviodiments, “La Patrie dal Friûl” e stimole il GNÛF governadôr
FULVIO MATTIONI
Pal economist furlan e covente une grande riforme de Regjon
“La prime robe di fâ al è recuperâ risorsis al belanç regjonâl: cence cheste jentrade dutis lis riformis a çuetein”: Fulvio Mattioni, economist e ricercjadôr furlan, al va dret al pont. “Ai 30 di Jugn dal 2019 o vin di riviodi i pats disgraciâts Tondo-Tremonti e Serracchiani-Padoan. O varìn di domandâi a Rome che e anuli prin di dut i 250 milions l’an che o vin di dâ al Stât (a jerin 370, la Serracchiani dal prin di Zenâr dal 2018 ju à scurtâts di 120 milions)”. Riviodi i pats, ma par fâ ce? “Riformâ in profonditât la aministrazion regjonâl e rilançâ la economie – al sosten Mattioni -. Lis Uti no son di podê miorâ. Chescj ents a puedin cjapâ sostance dome di une riforme fuarte de Regjon, cu la redistribuzion di funzions e competencis par ufrî servizis publics miôr e decentrâts. Se nol sarà un decentrament vêr, ancje di personâl e di risorsis, no si va di nissune bande. La Regjon e je un agregât mastodontic che al viôt lavorâ intal “palaç” almancul 5 mil personis (includûts i dipendents des ex Provinciis), plui une “part B” fate di 3 mil personis des societâts partecipadis. Vot mil personis no si guviernin, parcè che no si sa se chel che tu stâs fasint al à un sens o se tu varessis pluitost di fâ alc di gnûf”.
Ae Regjon “che si lassi la direzion strategjiche, il monitorament des politichis e il lôr miorament, e lis pocjis robis che no puedin fâ i teritoris singui, plui dongje dal citadin, des impresis e dal lavoradôr”. Un esempli? “O vin distrute la Agjenzie regjonâl dal Lavôr intal piês moment de crisi, il prin di Zenâr dal 2013, dant 6 mil euros di incentîf ai operadôrs dai uficis regjonâi dal Lavôr par che a deventassin provinciâi, dantjur dopo, cu la centralizazion de Serracchiani, altris incentîfs par fâ il percors contrari. I marcjâts dal lavôr a son locâi, nol à sens guviernâ di un scritori che al sta a Triest. I protagoniscj a àn di jessi lis impresis e lis personis che a cirin ocupazion (i disocupâts, i discoragjâts, i zovins che no cirin lavôr e no studiin), no i ents di formazion. O sin daûr a assisti al espatri di 4.500-5 mil zovins ad an. Di là di une pierdite di risorsis pe economie, si stin zuiant ancje il futûr demografic. Intai prossims 20 agns al è il pericul di pierdi 200 mil personis in etât di vore su 800 mil. Dal 2008 al 2018, o vin pierdût za 50 mil personis in etât di vore. Aromai e je une cuistiondi sorevivence”.
di Roberto Pensa
