SECONDE PART
Il glimuç di disgredeâ al è chel di discuvierzi la anime musicâl dal Homo Furlanus, par sgarfâ dentri di chês dimensions che a parin cetant lontanis dal stereotip nostran, votât al sens pratic, al savê fâ cu lis mans, plui che no bandonât intai sghiribiçs de creativitât e dal sium. La volte passade si jerin fermâts su lis olmis di Giorgio Mainerio, aromai plui che cognossût parfin a nivel popolâr, ancje par vie di chê “Schiarazzule Marazzule” che e pâr deventade la colone sonore di ogni sagre furlane in salse medievâl (nol impuarte se Mainerio al à vivût e scrit almancul cent agns dopo de fin de Ete di Mieç!). Come simpri al è une vore plui intrigant lâ a cirî personaçs mancul cognossûts e fûr dal cercli di chei che si ocupin di storie de musiche o de culture. Cuatricent e Cinccent a àn rapresentât un periodi di grande floridure in teme di notis, chi di nô. Par esempli Antonius de Civitate, muart intal 1425, al ven ricognossût in maniere universâl come un dai grancj mestris dal rinovament musicâl che al segne il pas par un mût gnûf di intindi la musiche sacre, che a à lis fondis su architeturis complicadis e maraveosis, come che e fos une catedrâl fate di sunôrs e di bielece.
◆ Di une altre gjenerazion, ma simpri inte suaze dal secul XV, al fo Andrea Marone, nassût a Pordenon intal 1474. Mestri di gramatiche a Vençon e a Glemone, al à dât grande prove di culture e di inteligjence ae cort ferarese dal duche Alfonso I d’Este: talentuôs sunadôr di viole e di liût, al improvisave poesiis in lenghe latine, intune specie di “free style” rinassimentâl. Tant brâf di jessi nomenât ancje di Ludovico Ariosto inte sô opare principâl, “L’Orlando furioso”. E simpri di Pordenon al jere ancje Marcantonio “furlanus”, cognossût ancje come chel “dal Violin”. Nevôt di un becjâr e fi di un muredôr, al discuvierç la sô vene artistiche deventant une autoritât in materie, cuant che al publiche a Vignesie, intal 1564, il “Primo libro de madrigali a cinque voci”, che in pôc timp al deventarà un manuâl cetant impuartant par ducj chei che a volevin studiâ e praticâ la musiche. Braurôs de so divignince, Marcantoni al firmave dispès lis sôs oparis come “Furlanus”.
◆ Il Sietcent al viôt doi zigants: un al è sigûr G.B. Tomadini. Deventât mestri di capele dal Domo di Udin intal 1775, posizion mantignude fin ae sô muart, al prodûs plui di dusinte manuscrits musicâi, ducj consultabii intal Archivi capitolâr. Chel altri al è L. Marzona, batiât a Vençon ai 3 di Març dal 1773, si fâs predi intal 1797. La sô cariere e tache a fâsi cul 1816, cuant che al devente capelan e mestri di capele intal Domo di San Denêl, là che al lavorarà fin tal 1852, an de sô muart. Il so merit plui grant al fo chel di jessi convint de impuartance di une educazion musicâl par chei “giovani miserabili che dimostrassero buone disposizioni nel canto e nel suono”. E cheste e sarà la sô mission, la cifre di dute une vite.
◆ Il Votcent al è il Secul di G.B. Candotti, nassût a Codroip intal 1809. Colaudadôr di cjampanis (ce mistîr, par un furlan!), al tache a componi musiche di cuant che al veve dome 17 agns. Al firme plui di Cinccent oparis. Om di grandissime ironie e autoironie, dispès si firmave cul non grêc di “Kynò sofos”, ven a stâi “can dotto”. Il so cjamp di produzion principâl e reste cence dubi la liturgjie, ma dispès i plaseve ancje scrivi cjançonutis plui lizeris, dispès su comission di amîs predis e parincj. Tant plenis di spontaneitât che si lis cjate ancjemò intal repertori corâl di plui di cualchi parochie furlane. Impussibil fâ di mancul di nomenâ Tita Marzuttini, se no altri pe sô vene anticonformiste e un fûr dal ordenari. Uniche pecje, chê di vê aderît al fassisim, tant di vignî sielt par fâ di Podestà. Nassût ai 9 di Fevrâr dal 1863, di famee siore, al tache a studiâ armonie za tal 1883 e intal 1885 al devente diretôr de bande di Tarcint. Fondadôr dal “Club mandolinisti” di Udin, intal 1886 al firme plui di dusinte oparis, e cetantis in lenghe furlane. Fra chestis, a restin impuartantonis lis vilotis musicadis su tescj che al veve scrit lui stes, o che al veve cjapât sù di Pieri Çorut e di Bindo Chiurlo. Publicadis su la riviste “Ce fastu?”, intal 1930, a son un patrimoni impuartant de culture furlane di ogni timp, ancje se nus dan une imagjin convenzionâl di un Friûl inesistent, fûr de veretât storiche, ma utile ai sorestants par fâ nassi chê mitologjie e chel stereotip che propit chi si cîr di smontâ.
◆ Il Nûfcent al è il secul di A.C. Seghizzi (1873 – 1933). Nomenât organist intal 1902, si è dedicât al insegnament de musiche e dal cjant, massime pe educazion des frutinis. Lis musichis di tantis vilotis de nestre tradizion a forin firmadis propit di lui, ricercjadôr convint di chê anime antighe che si platave propit sot des pleis de tradizion popolâr furlane. E dongje di Seghizzi si alce ancje la figure imense di Albino Perosa. Nassût a Rivignan intal 1915, vuarfin di vuere, al tache la sô cariere musicâl intai “Pueri cantores” dal so paîs. Jentrât in seminari intal 1924, antifassist convint, al partecipe ae Resistence partigjane. La sô passion e fo simpri peade al cjant popolâr furlan. Al sarà propit lui a salvâlu dal costum tradizionâl e des fufignis de convenzion. Il so contribût in chest al reste preziôs. Tal stes timp, convint sostignidôr dal principi pandût dal Concili Vatican II, al firmave un libri di cjants eseguîts a Udin intal 1972 ae presince dal Pape Pauli VI. Memorabil il so “Te Deum”, che al sierave i lavôrs dal incuintri. L’Orcolat dal 1976 al à contribuît a dismovi la cussience dai Furlans ancje par chel che al tocje la musiche, e la musiche tradizionâl in particolâr.
◆ La riflession impuartante fate de “Fieste di Chenti”, deventade in cualchi an “Folkest”, e reste un moment significatîf no dome in cont de riproposizion de culture musicâl intune clâf etnografiche, ma ancje tant che ocasion par stiçâ sperimentazions e leturis gnovis di un patrimoni milenari come il nestri. La “Sedon Salvadie”, par esempli, grup di musiche folk furlane, e je stade la mari di autôrs tant che Lino Straulino, mestri di chê gnove gjenerazion autoriâl che vuê e passe par Leo Virgili, Nicole Coceancig, Alvise Nodale e Massimo Silverio, cognossûts ben ancje intal forest. Ma si varessin di citâ ancje i “Mitili FLK” e la cjase di produzion musicâl “Nota”, di Valter Colle. Tradizion e sperimentazion a son simpri ladis ben dacuardi, intai nestris dintors: Rototom, Folk Club di Buri, Udine Jazz… al sarès cetant altri di contâ. Ancje se cheste e je dute “une altre musiche”. ❚
Fin de seconde part
