CURTIS E CHE SI TOCJIN. «In Europe, lavorâ par otignî risultâts pal Friûl»

Tes elezions a pene davueltis a son stâts elezûts pal Parlament european doi rapresentants furlans, la onorevule Serracchiani pal Partît democratic e l’onorevul Collino pal Popul de libertât, un record. Al è positîf che cheste volte a sedin stâts elets doi furlans pes dôs formazions politichis principâls, sei di centriçampe che di centridrete. Sperìn ben, ancje se al è di vê presint che dome la Serracchiani, rispuindint a un invît dal Comitât furlan pe difese de leç 482, e à scrit che «la valorizazion des culturis e des lenghis di minorance e je une condizion fondamentâl par rivâ a une Europe plui adulte e plui siore culturalmentri», impegnantsi a puartâ indevant, se elezude, i ponts  programâts dal Comitât 482. Il probleme, dut câs, al sarà di viodi ce che in concret chescj doi deputâts europeans a savaran fâ e puartâ a cjase. Naturalmentri, noaltris si riferìn no tant ae Europe e ae Italie, ma ae Patrie dal Friûl.
In cheste prospetive al sarà, cence altri, di dâsi di fâ par che tancj progjets di interès comunitari, come che ju clamin, a vegnin  fats bogns e finanziâts des autoritâts europeanis pal Friûl. A puedin rivuardâ cetancj setôrs, a partî de ricercje, de inovazion e dal disvilup des impresis, vint presint che il nestri sisteme produtîf al sarà penalizât ancjemò par un pôcs di agns de fiscalitât e dal presit dal lavôr che a son plui lizêrs tai Stâts a pene jentrâts te Union europeane. Ma si tratarà ancje di progjets che a podaran interessâ putrops altris cantins, come lis infrastruturis, l’ambient, la mont, la sistemazion idrogjeologjiche, il turisim, e v.i.
Come che si sa, la Union europeane par vê prospetivis positivis sul so avignì e à ricognossût dirits di vite e di identitât a ducj i popui – piçui e grancj – che le tegnin adun. E e à simpri sostignût, fin de sô nassite, la pupilance e la valorizazion des minorancis linguistichis e etnichis che, tai 27 Stâts aderents, a metin adun desenis di milions di personis. O volìn ricuardâ che tai agns passâts, fin ae  aprovazion de prime leç dal Stât talian pe tutele des minorancis linguistichis – la 482 dal 1999 – la Union europeane e jere cetantis voltis intervignude sul Guvier di Rome par che al metès in vore ancje in Italie lis Convenzions europeanis pe pupilance. Cumò, la Autoritât europeane e varà di jessi pocade a intervignî sei sul Guvier talian, sei su la Regjon, par che a sedin garantîts al massim i dirits linguistics, etnics e culturâi dai furlans, come pûr dai slovens e dai todescs dal Friûl de Alte.
Su chestis dôs grandis areis di intervent, si tratarà di intervignî di bande de Serracchiani e di Collino. Par meti adun une agjende di iniziativis europeanis concretis pe nestre tiere, tignint ancje cont des indicazions che a podaran vignî segnaladis sedi de Regjon, che de Comunitât des Provinciis furlanis, dai Comuns, des categoriis produtivis e des Associazions culturâls des minorancis linguistichis.
Curtis e che si tocjin, duncje. Ancje a Bruxelles, e no dome in Consei regjonâl e tal Parlament di Rome, si trate di lavorâ par otignî risultâts pal Friûl. Baste vê rispiet dai eletôrs che ti àn votât. Lu varano?
ARNALT BARACÊT