CULTURE. Sitcom furlane sul ôr de autostrade

Il microcosmi al zire ator ator di un autogrill. Lis situazions esasperadis a nassin di un malintindiment, che po si regole. Sîs personaçs cu lis lôr ambizions e preocupazions: Jacum, Gjise, Jessica, Milio, Fede e Katia. E po la marilenghe. Se o vessin di judicâ il gnûf prodot televisîf par furlan, jessût di mame Rai, no si savarès di dulà tacâ. Metìnle cussì: “Autogrill, une real-com furlane” – in onde su la tierce rêt Rai regjonâl, la domenie aes 10.15 – e je une robe gnove.
In prin, sul format: e je la prime Sit-com. La idee e je stade propit de regjiste Rai, Claudia Brugnetta (su sogjet di Paolo Patui) che e à pensât di fâ alc di diviers dal solit. Pal moment a trasmetin lis replichis de prime serie. Si tornin a proponi lis sîs pontadis di vincj minûts ognidune, za ladis in onde di Mai a Jugn di chest an. Plui un making of – vêr ghiribiç dal “daûr lis cuintis”, prontât tal cors de lavorazion – presentât di Dj Tubet e di Gigi Maieron, artiscj di ponte de gnove musiche furlane e guest stars in doi episodis. La prime pontade e ancje il “speciâl” si puedin viodi ancje su youtube, rispetivementri a tocs di doi e di cuatri uploads.
La cjosse, de bande de pachidermiche aziende di Stât, pardabon e maravee. Daspò agns di documentaris monotematics, di Gioias Melonis ator pal mont a cirî emigrants e lidrîs, di Pimpas e di Berto Lôfs dopleâts… biade la ore, alc che si gjolt. Cence stricecûr.
La sit-com e je stade zirade tun autogrill vêr, dongje Udin. La trame e je intiessude, ma batudis e recitazions a son ancje improvisadis. Si trate di une lavorazion fûr standard che, se e je cemût che i interessâts a declarin, e svicinarès il prodot finâl plui al format american, che a chel talian.
Inovatîf l’ûs des machinis di prese. “I ponts di viste a son doi. Di une bande o vin lis telecjamaris fissis, chês di servizi dal autogrill, e a chês si zonte une sogjetive. Il proprietari che al zire, al controle dut ce che al sucêt e al devente lui stes un voli pal spetatôr. Di fat, al interagjìs cun chês altris telecjamaris, tant che denant a un totem mediâl”, e spieghe la regjiste Claudia Brugnetta. Doi stîi diviers, doi ponts di viste che si messedin, intun armoniôs zûc di distacs. Ben organizâts e fluents.
Un unic dubi al reste. Saraie une butade e vonde, o li de television di Stât sono intenzionâts a produsi une seconde serie? Sperìn te seconde. Fasint buine la pussibilitât che, in efiets, la volontât e sedi. E che a sedin ancje i bêçs. Dome che o savìn cemût che a van lis robis in Rai. Dispès i contrats e lis convenzions che a stan daûr a riscjin di deventâ plui sit-com dai stes programs inviâts in marilenghe.
Oscar Puntel