CULTURE – LA FABRICHE DAI… LIBRIS. Contecurte

«Contecurte» (www.contecurte.splinder.com) al è un blog coletîf dulà che si presentin contis curtis (une pagjine o mancul), di diviers autôrs. Ogni mês nus proponin une conte publicade di cuant che al à viert, dal 2009.
Une storie si pues contâle ancje in pocjis riis: chest mês un presentìn dôs des plui curtis. Dôs contis in «tandem» che a fevelin di «spedizions».
SPEDIZIONS
di Dree Venier
O soi distirât sul divan cul spagnolet impiât che o cjali il scjatulon vueit: cumò o ai ancje jo il tv cul dolby surround, videoregistratôr, dvd, decoder, airbag e sa-il-cazzer. Dut a puest.
Mi freassial alc. No je fâs plui, jo o ai fat il gno dovê come che o vevi di fâ: lavôr sigûr, comprade cjase cul mutui regjonâl, paiadis tassis e boletis, cjatade la morose (une brave frute)… Mi freassial alc di ce che o ai.
Su chê scjatule fûr di misure al è scrit in grant «FRAGILE».
O jentri dentri di jê dopo vê telefonât ae DHL. O ai lassât la puarte vierte. Mi spediran di cualchi bande.
TANDEM
di Eowin
E jere za la tierce dì che e passave sentade tal mieç dal garage, ferme a cjalâlu.
No rivave a decidisi.
Chel tandem ros e blanc ju veve puartâts pardut: lui devant e jê daûr che e cjalave il movisi de sô schene… e la fadie dal pedalâ si sfantave intun moment. Une sincronie perfete, forsit par chel al jere cussì dificil sielzi.
Cun dut il rest al jere stât facil, lui i siei libris, cd e dvd ju veve za metûts di bande e marcâts cul so non. Fintremai dividisi lis çavatis al jere stât facil: jê e veve tignude chê di çampe… si capìs! Ma cun chel tandem no saveve pardabon ce fâ: tignîsi la part devant, dulà che no veve mai podût sentâsi, o chê daûr? La sielte e jere grivie.
Di bot e sclop però dut si jere sclarît «Cemût aio fat a pierdi tant timp?» si domandave cu la flex za piade in man. Si sarès tignude la metât devant parcè che si sa, tal tandem come te vite, e je simpri la femine che e decît la strade, ancje se no je jê a vuidâ.
Doman e varès clamât un fatorin par fâi recapitâ la sô metât.