CULTURE. La Cjargne in radio di 28 agns

Si dîs che prime di lâ “on air”, la condutore e vedi un cocoleç particolâr. A diference di ducj chei che a lavorin in radio, si gjave lis scufis juste un secont prime de direte, invezit di tignîlis. Cun di plui, nol è dificil cjatâle al microfon, in custum cjargnel.
Ma Novella Del Fabbro e je cussì. Si ben che no lavori in television, il vistît al fâs pandanne cul teme. Nassude a Fors Davoltri, scritore, studiose di tradizions e di culture de sô tiere, di 28 agns e je al timon di une trasmission che e à scomençât prime su Radio Onde Furlane, par trasferîle dal 1993 su Radio Spazio 103. Ogni lunis, des undis a misdì – gnove la colocazion tal palinsest – e condûs “Cjargne”. Sottitul: “Vite e sperancis de mont furlane”.
E chi o zontin une altre curiositât: la vôs de sigle e je chê di Fulvio Romanin, za “Madrac”, musicist e autôr, rapper dai “Dlhposse”.
La cjançon, invezit, e je il “Carnorum regio”, musiche e test dal mestri Zuan Canciani di Paulâr, deventât l’imni de Cjargne.
Duncje tornìn al program: trop che al è pandût il non di Novella, soredut tai piçui paîs di mont, Diu sôl lu sa. No ‘nd è piçule realtât che jê no cognossi, ni comunitât di mont che no vedi visitât.
O storiis, vicendis umanis e sociâls che no sedin stadis scandaiadis de sô curiositât, di gjenuine voie di comunicâ. E di fâ viodi che lis tieris altis no son vals-di-lagrimis-dulà-che-si-vaisi-intor.
«La vere sperance a son i zovins. Chei che a àn ideis imprenditoriâls o artesanâls, che a crodin ancjemò ae agriculture, che a restin salts aes lôr lidrîs. Anzit: a trasformin il savê culturâl de mont in oportunitât di svilup. Di chest mi plâs riferî» e sclarìs Del Fabbro.
Ogni cuindis dîs, la condutore e va “in esterne”. In gracie dai colegaments telefonics, dai studis di vie Trep la trasmission si sposte sul teritori. Sul puest, Novella Del Fabbro e fâs fevelâ la int. Ju tire dongje intune sale di comunitât, e spieghe tradizions, personaçs, impresis artesanâls. E scree situazions jenfri lis gjenerazions.
«Mi plâs un grum. Se o podarès, o fasarès simpri la trasmissions visitant i paîs, prin di dut par vie che o fâs partecipâ plui la int, che e pues dî ce che e vûl in libertât, e po par vie che, volint o no, il microfon dal studi al rapresente simpri un bloc, e mancje la spontanitât. Distès cuant che o ai tant che ospits scuelis e fruts, che mi fevelin dai lôr progjets in marilenghe».
Ancje il tapêt musicâl al è scuasit simpri dal vîf. Coros, armonichis, cjantosis a capele. A stan in file, par lâ ospits tal salot naif di Novella Del Fabbro. Jê che e cjacare cu la “o”, come chei di Fors Davoltri. O miôr: come che, une volte, si fevelave te tiere mari dai furlans (par esempli tai prins componiments poetics par furlan che a son stâts cjatâts, dal 1380, ndr).
Oscar Puntel