CULTURE – IL FRIÛL TAL ETERE. Biele gnove par TV

Esilarant. Inovative, te storie e tai personaçs. Finalmentri, la serie televisive che il Friûl al cirive e che dal Friûl e je une fotografie. O stoi fevelant di «Felici ma furlans», viaç tor dal «homo furlanus» par cure di Alessandro Di Pauli e Tommaso Pecile. Al sît internet www.felicimafurlans.it za si pues cjatâ il promo di presentazion. E la curiositât a chest pont no je dome stiçade ma e burìs fûr insiemit a interogatîfs che no rivin adore di vê rispueste. Il prin – e plui impuartant – dulà e in cuant laraial in onde? Il secont: cui ajal in mans la produzion? Isal auto-produsût? Se sì, al sarès doplementri favolôs, e esempli di program che nol cîr il finanziament public par esisti e lâ in onde, ma al va sul marcjât cul so valôr zontât di jessi in marilenghe. Al vîf, ven a stâi in funzion dal so consum e des domandis che al rivarà adore di vê, par plaçâsi in cualchi palinsest.
La storie, o disevi, che e je spieli e spacât di une gjernazie, che post taramot. In tancj a cjataran il propit «avatar», o forsit cualchi aspiet dal propri caratar. Gianni (Fabiano Dassi), il protagonist, al è nassût un ore prime dal Orcolat dal 6 di Mai. Al vîf tal mieç e di conflits. Ma al è insumiadôr e al viôt lis oportunitâts dulà che ducj a viodin disastrôs. Chest jessi «Felici ma furlans» al rimande a un sintiment transitori di ben stâ. «Essere felice» nol esist tal vocabolari furlan, se no te ecezion «beât» e «content». Bot e sclop, no alc a lunc tiermin. I atôrs a rapresentin ducj etis diviersis. E i conflits, spine dorsâl de storie, a son propit scuintris fra gjenerazions. Il «bamboccione» Stîf (Massimiliano Pividore) al vîf di rendite, machinis e feminis, sperperant ce che il pari – paron Serio (Giancarlo Freschi) – al à metût dongje une vite. Nina (Sara Missarino), la biele segretarie, un pôc fanè par sorevivi intun ambient di lavôr dut al masculin. Libero (Giorgio Merlio), pari di Gianni – za «salt, onest e lavoradôr», in crisi daspò de pension. E di sfont, dut un corolari di operaris – dulà che al ven fûr l’operari Beaudelarie (Massimiliano Gosparini), cussì clamât pe sô passion pe poesie. Il sît nus fas savê di 6 episodis.
A curin la regjie: Tomas “Uolli” Marcuzzi (che al è un garanzie di cualitât) e Ernesto Zanotti. No viodìn la ore di gjoldi di chest prodotin. Ancje par vie che al propon ce che il Friûl al è vuê: «no plui tiere di contadins- si lei sul sît -, ma di confin, dulà che culturis, oms, industriis a scombatin ogni dì lis sfidis dal mont globâl, simpri e in dut i câs in a Friulan way».
JAN TOTI