CULTURE – IL FERÂL. Malatie

Une robe che mi à fat simpri rifleti tes tantis voltis che mi à tocjât di lassâ la mê cjase e la mê int par lâ tal ospedâl, e je chê dal livelament che si opere tes personis. Di fûr un al pues jessi predi, mestri, avocat, diretôr, VIP. Li dentri, soredut dentri di se, al è crot come ducj. Al lasse su la puarte dal ospedâl dute la sô munture e lis sôs medaiis e i siei grâts e titui e si presente malât tra malâts, biadaç tra biadaçs. Inte cjase dai predis a Udin, i vevin lassât al vescul Pizzoni un apartament intîr, pal fat che al jere vescul, e lui al voleve in cualchi maniere comandâ o jessi tratât seont il so grât. Alore un predi vecjo i à dit: «Che al sinti, siôr vescul. Che nol stedi a crodi di fânus di uficiâl e di tratânus come fantarie. Chi no ‘nd è caporâi; chi o sin ducj te mierde!». Po stâi che un siôr o un VIP al vedi une stanzie plui biele o al vegni tratât cun plui rivuart, ma la pôre dentri di se e je compagne e ancje la malatie no fâs diferencis.
Cheste fragjiilitât e precarietât e à di jessi combatude e judade, par podê ricostruî un ecuilibri ancje se un pôc artificiâl. Chest al è il compit uman e cristian di chei che a àn la vocazion di esercitâ la opare di misericordie dal proviodi ai malâts, come che nus domande e nus comande il vanzeli (Mt 25). Une mission grande come e forsit plui di chê dal predi, parcè che il predi al tocje il cuarp dal Signôr platât tal sacrament, ma il miedi e l’infermîr al tocje il cuarp dal Signôr platât tal puar e tal malât, un cuarp vîf e dolorant. Une mission che e cualifiche, e nobilite, e santifiche une vite, se fate cun professionalitât, umanitât e cussience. Nol è gno compit insegnâ a altris il lôr mistîr. Mi permet dome di dîur, di dîus di tratâ il malât cun serietât e cun serenitât, cun veretât e cun sperance…
…Se la malatie e met ducj tun stât di fragjilitât e di precarietât, chest al è tant plui vêr e acentuât tal câs che il malât al sedi furlan. Parcè che al va dit che, se ancje si vîf, volint o nolint, simpri plui a nivel di mondialitât e di globalizazion, e reste simpri tal om chê component di fonde, chê carateristiche peculiâr, chê somatizazion des esperiencis passadis che si tramude in identitât di un popul. Une sorte di DNA che al è dificil, se no impussibil o inutil, liberâsi. Mi vês domandât se il furlan al à une maniere particolâr di patî. Il dolôr nol cognòs confins o nazionalitâts. Al va dit però che ogni persone e patìs a mût so e ancje ogni popul al à une sô maniere particolâr di frontâ il probleme dal dolôr. Parcè che al à une psicologjie, une tradizion, une esperience, une sensibilitât peculiâr. Nol è che il dolôr dal furlan al è plui grant di chei altris; al è che il furlan al è diferent e duncje al patìs in maniere diferente.
Prin di dut al è un popul usât plui al scûr che a la lûs, plui a patî che a gjoldi, plui a tribulâ che a sperâ. Chest al varès di judâlu, e lu jude tant, tal frontâ il dolôr, soredut il dolôr fisic, ma al devente un ostacul par chel che al rivuarde la sperance. Al è plui fuart tal patî ma al è plui debul tal sperâ. Pa la cuâl, plui che sburtâlu a acetâ il mâl, si à di sburtâlu a sperâ, a reagjî, a no colâ te rassegnazion e tal fatalisim, a frontâ la malatie cun positivitât. Fâi iniezions pal dolôr, ma plui ancjemò iniezions di sperance. Di reazion e di reativitât, in mût che al colabori psicologjichementri e spiritualmentri a lis scuris che i vegnin fatis.
Jessint un popul che al à traviersât moments dramatics, che al à cognossude la tragjedie de emigrazion, des invazions, des vueris, dai taramots, de fam, al è un popul che al tint a sierâsi. Reazion plui che legjitime denant di sfidis tremendis come chês che si è cjatât a frontâ. Ancje lis rosis, denant dal frêt e dal scûr, si sierin. Ancje lis plantis, denant dal crût dal invier, a pierdin lis fueis. Dut chest al puarte il furlan a sierâsi in se, a rumiâ, a tignî par se sperancis e pôris, cence sintî la dibisugne o la gole di comunicâ la sô situazion interiôr nancje a chei di cjase. Lis visitis dal ospedâl a son un spieli evident e preocupant. Si sta li cence dîsi une peraule, nancje tra om e femine o tra gjenitôrs e fîs, come se un mûr psicologjic al dividès il malât dai parincj. Si stente a fâ un discors vêr e gratificant. O si tâs o si fevele dal timp o magari si dopre dut il timp disponibil a fevelâ di balon, che e je la maniere plui stupide di imbroiâsi. A proposit di cheste dificoltât relazionâl, o ai assistût a un câs che mi restarà te crepe e tal cûr fintremai che o tirarai flât. Mi soi cjatât tune stanzie dal ospedâl di Udin là che si ricoverave un om su la cinquantine par un tumôr tai rognons. La femine lu à judât a disvistîsi e a meti la robe tal armâr. Po lui al à tirât fûr dal tacuin lis fotografiis dai doi fîs e i à dit a la femine: «No sai cemût che e larà a finîle. Ti racomandi: viôt di lôr». La femine si è come incorade e lu à bussât. Alore lui le à cjalade fisse e i à dit: «O vevi di vê un tumôr par cjapâ une bussade!»…
pre Antoni Beline