CULTURE – Furlans inte ItalTV

In cheste rubriche, li che o fasìn i pulçs ai programs e ai protagoniscj de television furlane, cheste volte o fasarìn il contrari, dant rilevance ai protagoniscj furlans che si distinguin inte television taliane. L’ultin esempli al ven dal trop di furlans che a lavorin a SkySport24. Il cjanâl dal tycoon Murdoch – che si cjape dome vie satelit, comprant apont il “pachet  sportîf” – al à imbarcjât ben trê gjornaliscj dai nestris, ducj passâts pe cjase mari di Telefriuli. E cun di plui, a son ducj sot i cuarante agns.
Il veteran al è Marco Caineri, di Tisane. I patîts dal balon lu ricuardaran par vênus contât lis impresis di Oliver Bierhoff, cuant che i dirits ju veve Tele+ e nissun al veve Tele+, si che al tocjave fidâsi des cronachis dî chê rêt de Patrie. Ete là che la Udinese al començave a metisi in mostre, fin dai Novante. Dopo vê lavorât par cinc agns a Telefriuli, seguint e comentant ancje lis impresis de Snaidero basket, Caineri si spostà a Milan, par “Antenna 3 Lombardia”, ocupantsi dal coordenament de redazion sportive. Cumò al è a Sky di cualchi an, simpri cun funzions di coordenament. Par chest, rarementri si lu viôt in video, sul 400.
Diviers il câs de bionde storiche, Giorgia Bortolossi. Che daspò jessi sparide dai scherms regjonâi, e je stade sielte de stesse emitent par ocupâsi simpri di Udinese. E cure propit i colegaments di Udin, cun telecronachis e intervistis fûr dal cjamp di balon. Preseade in redazion – a disin –  pe competence, pe sigurece, pe voie di lavorâ e, da bon ultin, pe umiltât.
L’ultin acuist al è un zovin di Pasian di Prât, Francesco Cosatti, plui telegjenic di Caineri (prerogative indispensabil par lavorâ a Sky) e duncje doprât par seguî e par comentâ i gjornâi in video, a pene che a saltin fûr. In pratiche, al è lui che al da la svee e la buine gnot ai patîts de “pignate televisive” di Sky, componint une rassegne stampe di sport, traviers di un computer interatîf (touchscreen), sfiliant cui sei dêts pagjinis eletronichis e evidenziadôrs zâi virtuâi. E Cosatti – partît dal Gazetin e gavete a Telefriuli – cumò si gjolt ancje il so grup su Facebook: “Al touchscreen con Francesco Cosatti fans club”. Sottitul: “Per chi si sveglia con la rassegna stampa Skysport24 e per chi va a dormire con Francesco Cosatti al touchscreen!”. In dut, però, i simpatizants de rêt che à àn aderît a son dome 153.
Jan Toti