CULTURE – E pe fin dal an… I TV Award de Patrie

Rivâts al ultin numar dal 2009, tocje fâ un belanç di un an di television in Friûl. Alore o vin decidût di consegnâ cualchi ricognossiments simbolic par ogni gnove che o vin spiât chest an, chel che nus è plasût di plui e chel di mancul. Si che duncje, come che Udin al da il premi “Terzani”, nô – che o sin figots e che no volin jessi di mancul – o vin inmaneât il premi “Terenzani”, in omaç al inmagant gjornalist furlan, prin “anchor man” de nestre storie catodiche e, par agnorums, muse di Telefriuli.
Ve chi il befel che la preseade Academy de Patrie e à burît fûr, par no scontentâ nissun.
Premi “Terenzani” al personaç televisîf dal an.
Lu din vulintîr a chel condutôr dut impostât dal tg di Telefriuli, che si clame Filippo Fois. Gnûf il stîl di dâ lis gnovis. Dizion prin di dut: batût ancje Missana. Inzessât, cence cimiadis: al è in stât di lei la ricete dal dentifrici e une declarazion di Tondo cence pandi difarence. Al à aduès la ligrie di Sergio Endrigo (requiescat), ma ancje la petenadure a articjoc di Orietta Berti. Beât lui che al pues.
Premi “Terenzani” al personaç rivelazion dal an.
Lu din a Omar Costantini di VideoRegione. Ciertis sogjetivis dutis furlanis, un ciert talian-peato-col-filistrino lu rindin un personaç mitic: di perdonâi ancje chei judizis e chês frasis fatis che lui al dopre come i savôrs. Ma in fonts, in stîl jaculatorie: libera nos Domine.
Menzion “Bruno Pizzul” (il balon prin di dut).
Le din a TeleQuattro. Dulà che une cierte Monica Valendino, bionde dal sport, cun sô comari Monica Tosolini, a fasin de Udinese il leitmotiv de lôr esistence. Il duo al partecipe a dutis (dutis!) lis conferencis stampe organizadis de Udinese Calcio. Chest sì che al è gjornalisim militant!
Cope “Daniele Damele” (vâl a dî: politiche e comunicazion).
Al va al politolic, gjornalist, professôr, diretôr dal cors di perfezionament in gjornalisim sportîf e responsabil de radio de universitât dal Friûl, Francesco Pira. Par une che a ‘nd fâs, cent a ‘nd pense. E ogni volte che al è invidât di cualchi bande – sedi un program di Radio Rai sedi la sagre dal Pignat – al à di infestâ cui sei comunicâts stampe lis caselis e-mail di dutis lis redazions. Comunicazion a pleton.
Targhe “Dario Zampa” al miôr program di intrateniment in marilenghe.
Il premi che al ledi a Oscar Puntel di Free. Ce miscliçot il so “Mandi”: un pôc cjargnel, un pôc furlan, un pôc talian. Un cors di perfezionament ae Filologjiche isal domandâ masse?
Targhe “Gioia Meloni” al miôr program de domenie.
Domenie e vûl dî balon. Duncje, lu din a “Poltronissima” pe gnove cubie dute cjargnele Spangaro – Radina (Tf) e ancje a “Sportissimo” di Presello – Bertotto (Free). In paritât: ics. E pe “Pax televisivae” no sarà plui une vuere frede par freâsi chei cuatri ospits.
Jan Toti