CULTURE – E-MARILENGHE. La e-Furlanie e divente plui puare

Lenghe.net, un dai riferiments dal gjornalisim furlan, e siere, lassant i siei letôrs cuntun messaç de diretore Anna Bogaro. Cheste testade, editade dal Istitût Ladin Furlan «Pre Checo Placerean», dopo de esperience su cjarte dal mensîl «INT» e sîs agns di vite virtuâl, e ferme i siei ingranaçs cu lis peraulis che la responsabile e sielç pal comunicât di sieradure presint sul sît, e pe resinte interviste dade fûr sul cuindisinâl «Il Diari». La Bogaro e conte des dificoltâts di une clape che e scombat di agns par fâ une informazion di cualitât in forme bilengâl e simetriche (furlan/talian). La decision e rive massime par vie dal discontent pe mancjance di rispuestis concretis e soredut par colpe dai salts di cualitât te mentalitât politiche, in rispueste aes dibisugnis de informazion par furlan. Ma sono prospetivis pal avignî? Sul sît, l’avîs al è compagnât de fotografie di une rose di tale che e lasse svolâ lis sôs samencis, e chest nus lasse sperâ in positîf. Al somearès che chei di Lenghe.net, dopo vê distudât la insegne e sierât la barache, e vebin lassât il barcon viert. Di fat, sul sît al è ancjemò pussibil notâsi ae newsletter, di mût che – e anticipe la diretore – a podaran rivarâ tes caselis di pueste eletroniche dai notâts lis novitâts sul – clamìnlu cussì – progjet de rinassite, che par cumò al è ancjemò lontan. Il grup gjornalistic di Lenghe.net, insome, nol intint molâ la rêt, che i à puartât tai agns une vore di gnûfs letôrs, soredut di fûr dal Friûl. La promesse e je chê di cambiâ «muse, struture e obietîfs», cu la zonte di un impegn par fâ savê alc su cheste resurezion e mudament. Un adiu che nol è un adiu, insome. Un mandi e un a riviodisi di bande di chei de Patrie.
Michele Calligaris