Cuistion catalane: unioniscj e indipendentiscj indevant cence dialic

La cuistion catalane e va indevant a disglagnâsi su doi plans che no si tocjin: chel unionist e chel indipendentist.
Suntun plan e je la rigjiditât dal unionisim, che al vûl imponi la so posizion, ma nol cîr soluzions. Al pâr che in Spagne no si domandin ce rapuart mai che a podaran vê cu la Catalogne, cuant che une part dongje de metât de popolazion e vûl la indipendence e une maiorance tant plui largje no acete la prepotence, la violence, lis bausiis, la incapacitât politiche di Madrid.
Di fat in Spagne e je la autodistruzion di une democrazie debile, che no à mai taiât il so leam cul franchisim: par mantignî la unitât monolitiche de Spagne, fondade ancje su la predazion economiche de Catalogne, si sdrume la costituzion, propit intant che si declare di difindile. Si fasin e si disfin leçs daûr de bisugne, si acuse di ribelion violente int pacjifiche, si presee i poliziots che a àn bastonât lis vecjutis, si met in galere inocents par ricatâ cui che al à une idee contrarie a chê dal guvier, i judiçs a agjissin par ordin dal guvier. Pal moment, in non de stabilitât, la Europe al somee che no fasi nuie, ma o rimarchi doi concets: «in non de stabilitât», al vûl dî che lis robis a cambiaran par vie che la strategjie unioniste e cree dome instabilitât; «al somee», al vûl dî che sot de superficie diplomatiche a sucedin tantis robis.
Su chel altri plan si môf l’indipendentisim. Pal moment i mancje supuart internazionâl e al à un supuart popolâr grant, ma no avonde di garantî une vitorie svelte e nete. Par cuintri al dimostre une grande elasticitât tatiche, nol à pôre di passâ dal braç di fier ae elusion dal aversari, disorientant il guvier di Rajoy, ancje cun acrobaziis (la indipendence sospindude a pene declarade, lis elezions prime anunziadis e dopo invezit cambiadis cuntune proclamazion de republiche, Puigdemont “esiliât” in Belgjiche…) che i indipendentiscj stes di prin bot no capissin, ma che po in curt a acetin.
La partide e va indevant, ma pal moment al somee che ancje se al sarà dificil che la Catalogne e vinci, al è sigûr che la Spagne e pierdarà.
✒ Sandri Carrozzo