Crisi de zonte regjonâl inte crisi de politiche…

Intant che o scrivìn chestis riis, la maiorance regjonâl dal president Fedriga si cjate intune crisi une vore strambe. Siet assessôrs (chei de liste Fedriga, di Forza Italia e de Lega Nord) si son dimetûts dopo di un atac ae sanitât di Riccardi de bande dal ministri di Fratelli d’Italia Luca Ciriani. Al somearès clâr che la cuistion in se (il gnûf ospedâl di Pordenon, che nol va indenant) e sedi dome une scuse par misurâ il podê jenfri FdI e LN, no dome in Friûl-V.J. ma in dut il Nord de penisule.
◆ Nol è un câs di fat che in chel contest, il guvier di Rome de Meloni al vedi impugnât ae Cort Costituzionâl la leç eletorâl de Provincie Autonome di Trent che e proviôt la pussibilitât dal tierç mandât pal president Fugatti de LN. No savìn cemût che la Cort si esprimarà ma, se lis Autonomiis speciâls a àn par statût la competence in materie eletorâl, alore no viodìn il motîf par sminuî chestis prerogativis.
◆ O podaressin ancje jessi dacuardi sul fat che dôs tornadis legjislativis pai presidents (e assessôrs nomenâts di lui) in chest sisteme di elezion direte a sedin plui che avonde par davuelzi il program eletorâl cence colâ intune vere e proprie “ditature”. No a câs ju clamin governadôrs… (in altris timps ju clamavin Gauleiter). E par cumò no esistin compensazions di altris podês a garantî une partecipazion democratiche. Il Consei Regjonâl in chest contest nol conte nuie e baste une menace dal president di dimetisi (si visaiso di Illy?) e dut al passe cence discussions.
◆ O disevin che o podaressin jessi ancje contraris al tierç mandât, ma intes Regjons e Provinciis autonomis chê decision e à di jessi cjapade in chei parlaments, e no su la fonde des volontâts romanis. Si podarès obietâ che però no puedin jessi disomogjeneitâts in teritoris diferents, che la leç e à di jessi compagne par ducj. Ven a stâi: parcè a De Luca in Campanie no e a Fugatti in Trentin sì? Ma scusaitmi, se la penisule e fos dute vualive, dute compagne, coventaressino lis autonomiis speciâls? Se a esistin autonomiis speciâls, al vûl dî che chei teritoris e chês comunitâts alc di diferent, recepît de Costituzion, a varessin di vê.
◆ Par dîle dute, une volte di plui la Italie si conferme un Stât centralist, par nuie viert al federalisim dai teritoris. E intun moment di crisi de politiche tout court, come chel che o stin vivint, lis decisions ancje pesantis come cheste a riscjin di passâ cence nancje bati cee.
◆ Secont nô la Cort Costituzionâl, se o fossin intun Stât normâl, e varès plui di cualchi dificoltât a dâi reson al guvier, ma in Italie lis leçs si tirin di ca e di là come la piel de borse. E duncje no si spietìn grandis decisions. E reste però la pussibilitât de bande dal Consei regjonâl di lâ fin insom, discutint e aprovant la leç, magari fasintse po dopo impugnâ. O ben, parcè no pensâ di tornâ, cuntune leç regjonâl di pueste, a un sisteme proporzionâl cence elezion direte che no proviôt limits di mandât? Sfidant Rome e il guvier! Che Fedriga al vedi lis balis par un tant? ❚