«Spieli, / parcè che e je une peraule cuntun biel sunôr / parcè che o viodìn il mont di une prospetive feminine e feministe / parcè che un spieli al mostre dut e nol plate nuie / parcè che cu la musiche si viodìn plui claris»
A son deventadis amiis, cognossintsi lant a scuele sul pulmin di Listize, e dal 2016 a àn tacât a fâ musiche divertintsi insiemi. Marta Savorgnan e Margherita Cogoi a son “ConFusione duo”, duet musicâl tignût dongje de passion e dal talent pe musiche e pal cjant, che al propon covers talianis e internazionâls, sunadis e rangjadis cun piano e vôs.
◆ Il lôr non “ConFusione” al è nassût intun moment de vite dulà che lis dôs cjantautoris si sintivin cussì, un pôc in confusion, viodût che no savevin ben ce fâ dopo dai studis tal conservatori e cu la idee di meti insiemi stîi e peraulis, fondintju. «In “ConFusione duo” o sunìn e o cjantìn tantis cjançons di autôr, lant a cucâ ancje tai repertoris dai cjantautôrs che a scrivin par spagnûl e par francês, ma ancje i grancj classics, che a funzionin simpri, parcè che la int si sint coinvolzude.»
◆ Tai ultins timps però a àn tacât lôr stessis a scrivi tocs ducj par furlan, e a àn decidût di fâ nassi il progjet clamât “Urtie” par contâ di un teme ben specific. Cul lôr prin album “Spieli” il progjet al vûl rifleti, come un spieli, su ce e cemût che lis personis nus viodin e cemût che a percepissin il mont che o vin dulintor.
◆ Il non “Urtie” al è stât sielzût parcè che a volevin dâ un non autonom al progjet di tocs origjinâi. «Nus plaseve la idee di dâi un non di plante, e viodût che i tocs no son masse complasents, la urtie nus someave la plante juste. E je ancje terapeutiche, tu fasis i risots, ma ti beche.»
◆ Tal disc a son siet i tocs «di contignût politic fuart, che a rondolin jenfri la musiche culte, la flabe, il cjant popolâr, la Afriche, il cjantautorât, il cabaret brechtian… restituint il riflès di une vision dal mont sclete e feminine». Cussì al scrîf Leo Virgili par presentâ “Spieli” tal cartelon di SUNS Istât di chest an. Leo al è ancje il produtôr par “Urtie” e al à rangjât cualchidun dai tocs di “Spieli”. «Spieli al è il nestri prin, amât disc. Al è pardabon une part di nô, di ce che o pensìn, viodìn e sintìn, e par chest par nô al è preziôs.»
◆ La cjançon plui politiche dal album e je “Gote par gote”, che e conte la storie di un migrant cence documents che al ven sierât tun Centri di Permanence pal Rimpatri. E je une cjançon une vore cjare a Margherita, e tal booklet dal cd al è ancje scrit che la cjançon e je dedicade a cuatri personis che a son muartis tal CPR di Gardiscje. Un altri toc politic, ancje se intune altre maniere, e je “La barcje”, la prime cjançon che “Urtie” a àn scrit, che e fevele di un cjapitani che nol à voie di cambiâ rote, a rapresentâ il cambiament climatic. Une altre cjançon che plui e sta a cûr a Marta e je ”Dincj”, la storie di une femine maltratade dal om che a un ciert pont e devente une zigante mostruose.
◆ Ogni toc al è unic e al conte dal mût di jessi e di vivi in Friûl, che al combat il mont globalizât dal mileni che o stin vivint. Il teme dal album al è chel di scuvierzi une dimension che e rivi a sorevivi a dispiet dal timp che al passe. Chest Istât a àn sunât in diviers lûcs ator pal Friûl, ma soredut a Suns Europe in Avost, e in Setembar a àn presentât l’album a Ravasclêt, in Cjargne, te suaze dal concors Il grido di Pasolini, e a Lusevare in colaborazion cu la associazion Casa Langer.
◆ Staitjur daûr su Facebook e Instagram, sedi sot dal non “Urtie” che “ConFusione duo”. Margherita e Marta a continuin a vê cheste dople identitât, e cuissà ce tantis aventuris musicâls che o podìn spietâsi di lôr. ❚
