COGNONS DAL FRIÛL

Midiant de storie dai cognons furlans, si fâs ancje la storie dal nestri Friûl. Ve chi cualchi predi furlanist innomenât, che propit chest mês e cole la memorie de muart di pre Toni Beline. Vie par chest an, a saran ancje inovâi impuartants di chei altris doi nons…

(gjavâts fûr di «I cognomi del Friuli» di Enos Costantini e Giovanni Fantini ed. La Bassa/LithoStampa. O ringraciìn i autôrs pe disponibilitât e pe colaborazion).
BELLINA
Salacor di Belìne, un antîc ma cetant biel non di femine. Il prof. Merkù nus vise, però, che Belìna al jere un non maschîl doprât avonde dispès in Val Resie inte Ete di Mieç (achì te forme Bilina, bielzà in documents dal XIII secul) e intes Vals dal Nadison: al ven dal sloven bèl “blanc”, plui il sufìs –ina. Intal Sîscent Stefano Bellina di Resie al jere civis veteris urbis Pragae (vie pe fin dal Cinccent a Praghe e jere une piçule colonie roseane). Il cognon al è tipic di Vençon, ma al è avonde presint ancje a Glemone (7 fameis intal 1929) e Udin; si cjatilu ancje a Paluce, Tumieç, Puçui, Scluse, Mueç, Prissinins. No savìn se il râr Bellina di Manià al è dal puest: nus fâs plasê citâ jacubus Biline documentât a Manià Livri intal 1378.
MARCHETTI
Diminutîf dal non maschîl Marc. Marchèt al è plui difondût des bandis di Feltre che in Friûl. Marchetti al è un dai cognons tipics di Montenârs di dulà si è adore trasferît a Glemone (1563 Leonardo Francesco figliolo di Daniele Marcheto di Montenario; 32 fameis intal 1929); al è avonde ben presint a Udin e Codroip; si cjatilu ancje a Osôf, Monfalcon (1589 Caterina di Gio. Maria q. Marco Marchetti di Fogliano), Tavagnà, Dartigne, Bertiûl, Sant Michêl; Marchetto, avonde difondût in Venit, si cjate cualchi volte a Lignan.
PLACEREANI
Al ven cence dubis di Plazàriis, localitât (documentade dal 1295 tant che Plazargiis) in comun di Montenârs, cumò scuasit cence int ma une volte abitade dai… Placereans. Intal 1438, a Glemone, al è ricuardât un infantulin di Michul Plaçarian d’Artigna. Cognon carateristic di Montenârs (Plazzareani intal 1590, Plazzariano intal 1599, Plazzareano intal 1620, un Stavolo Placereani si cjatilu intal Istitût Gjeografic Militâr); presint a Udin. Intal 1622 Petrus Placerianus Treppi magni. ❚