Cocâi o dolfins, o paìn simpri noaltris

Orpo, ce grande operazion che a àn fat a Lignan: dome par cualchi euro a àn cambiât il logo de splaze. No plui il cocâl, poiât su la scrite dal paîs. Tal so puest un dolfin cu la code che e finìs tant che la spirâl di D’Olivo. Mâcs de comunicazion, dome che si à scuviert che il progjet al jere vecjo di uns dîs agns. “Ce impuartial?” a àn pensât, al coste pôc e nuie.
Si viôt che chê dal sparagnâ e je propit un claut, viodût che il Comun nol à tirât fûr nancje un franc pe promozion turistiche tai ultins agns.
Cussì a resonin tancj dai nestris aministradôrs che si contentin di cambiâ dome alc cence viodi plui lontan, fasint une falope daûr chê altre.
Cjalait la riforme dai ents locâi metude in pîts di Panontin, tant lofie che la zonte Serracchiani e torne a meti man par evitâ almancul di jessi cjapade pal boro dai tecnics de aministrazion publiche.
Ancje chi dut fat tal non dal sparagn: “lis provinciis a costin masse, si à di sierâlis”. Ti àno presentât un alc, cualchi numar, par fâ buine la lôr decision? No, dome retoriche e ideologjie.
A àn fat cussì ancje su la cuistion dal numar dai conseîrs regjonâi: a saran di mancul ancje chi par “sparagnâ”. Ma, se par mantignî un rapuart tra elet, teritori e istituzion, in sumis, par no copâ la democrazie, invezit di ridusi il numar, a ridusevin il lôr stipendi no jerial miôr?
Cussì tra un cocâl e un dolfin, si va indenant cence nissune vision strategjiche, dome cu la borie di podê fâ ce che si à voie, di jessi parons.
Une peraule che dispès e fâs rime cun cjastrons. ❚
✒ L’om di Buri