In vie Riviere 2, a Dimponç, frazion di Tumieç, intune biele posizion panoramiche, si cjate il laboratori di ceramichis di Daniela Di Ronco.
◆ Daniela e à fat dut un so percors prime di rivâ a scuvierzi il mont de ceramiche; e je stade insegnante, e je mari, e à gjestît par 10 agns un Bed and Breakfast a Dimplan, e à fat part dai Carnia Greeters. “La esperience dal B&B e je stade pardabon biele: tu âs il mont che ti jentre in cjase! – e conte Daniela – O vevi int che mi diseve ‘cui vûstu che al vegni in Cjargne?’ e invezit no je stade propit cussì. Cuant che te universitât o ai studiât la storie dal Friûl e de Cjargne, mi soi rindude cont che o vivìn intun puest che al è stât un lûc di passaçs, plen di bielecis di viodi: de archeologjie ae lenghe, ae musiche, ae botaniche, ai personaçs che a àn fat la storie tant che Michele Gortani, ae gjeologjie, ae art, ai cramârs, al mangjâ. Insome, o vin di dut e di plui! E chest mi à zovât tal fâ cognossi, a int che si è fermade tal B&B, lis bielecis di cheste tiere di Cjargne. A un ciert pont però mi soi sintude che o vevi inmò alc in predêl, alc di no risolt, e infin, messedant paste di pize, mi soi inacuarte che o vevi une cierte predisposizion in chest. Mi soi confrontade cuntune amie che mi à dit ‘Ma ti impensistu che cuant che o vevin 20 agns o jerin ladis a domandâ ce che al coventave par vierzi une buteghe di ceramiche?’ Intant o ai cambiât cjase e o soi tornade in chê dai miei gjenitôrs e dai miei nonos maternis. Vierzint i armârs, ju ai cjatâts plens di vâs di ceramiche che mê mari e veve poiât vie. In efiets, come che mi veve fat impensâ la mê amie, ogni volte che o fasevi un viaç, o tornavi cjase cuntun vâs di ceramiche. Po dopo o ai cjatât une scudiele di mê mari che e jere grande, vecje e smaltade dome par dentri: chest al è deventât il gno focus, fâ alc cun nuie e cu la miserie di un timp, cuntune decorazion semplice. La int cjargnele e viveve cun nuie ma e veve il gust dal biel, dal decorât. O pensi che la Cjargne e puedi jessi une tiere di ispirazion! E cussì o ai vût il coragjo di començâ la aventure. O ai comprât un torni piçul e o ai tacât a provâ. O ai fat un cors vie internet e o ai scuviert un mont di materiâi che a vegnin doprâts daûr de cuete che si vûl fâ. E je une magjie scuvierzi che, se tu cueis la tiere, e devente alc di util e di interessant. Il biel al è che si doprin ingredients naturâi: tu impastis la tiere cu la aghe e cul aiar e dopo tu le cueis une o dôs voltis. O vuei recuperâ ce che si faseve par tradizion ma metint il gno sintî.”
◆ Daniela tai ultins timps si è concentrade sul fâ prodots funzionâi. Al è interessant stâi daûr su lis sôs pagjinis, su Facebook https://www.facebook.com/daniela.dironco e su Instagram. I siei prodots a son lâts a Malte, in Polonie, France, Svuizare e Gjermanie,
◆ “Cjeres al fâs part di un progjet là che a àn partecipât tantis personis che a mi àn sostignude – e va dilunc Daniela – Il non “Cjeres”, che jere un di une lungje liste, par esempli, mi lu à sugjerît la mê vicine. Il logo che o met su ogni mê creazion mi lu à fat in 3D un amì de Gjermanie che al vignive tal B&B.”
◆ Daniela e je une farie di ideis e no mole un moment di meti in lûs il leam fuart che e à cu la sô tiere: “Cuant che mi senti e o bêf une tisane te tace che o ai fat, o stoi cun me, cu la tace, cu la tiere; se dopo in chê tace o ai dissegnât alc che al da vite aes sensazions, inmò miôr! Il gno obietîf al sarès chel di vivi di chest, ma ancje fâ cognossi e creâ emozions che a nassin di cheste biele tiere. Un pas par volte, ancje inçopedantmi, o cîr di lâ indevant.” ❚
