CJARGNE VIVE. Sul fîl tra inovazion e tradizion

Fin di piçule Chiara Banelli e à vude la passion dai vistîts e dal cusî. Finidis lis mediis e je lade al ISIS D’Aronco di Glemone indulà che e à podût coltivâ cheste passion. Tal 2007 e à partecipât pe prime volte al concors di mode di autôr a Lignan, rivant seconde inte categorie dai students. Chest al è stât il prin pas intal mont de mode, une ocasion che i à viertis altris puartis. Di fat, tai agns a vignî e à podût cjapâ part a altris concors: a Salerno intal concors nazionâl SMAC (rivade seconde), a Firenze te Fuartece da Basso (e à imbastide une sfilade personâl), a Stintino, a Matera, intal Premi Mode citât dai claps.
Chiara si è cjatade cussì a confrontâsi cun grancj professioniscj talians (ducj plui grancj di etât) e a puartâ a cjase diviers premis e, soredut, tantis sodisfazions. «Mi plâs, intai miei vistîts, messedâ il stîl tradizionâl cun chel moderni», e conte la zovine di 23 agns. «Ducj i miei vistîts a àn un alc di cjargnel. Par rivâ a chest, o ai fatis diviersis ricercjis, o soi lade a viodi il museu di Tumieç, o ai let cetancj libris par capî cemût che une volte a vignivin fats i vistîts». Cuant mai un pâr di scarpets isal stât imbinât a un costum di bagn se no inte linie dai costums ideade di Chiara?
Lis ideis a nassin e a cjapin vite inte cjase di Chiara, a Treli di Paulâr: «Cuant che mi ven la ispirazion, mi met a disegnâ e po o tachi a meti adun; mi capite di fâ modifichis ancje cuant che il vistît al è sul figurin… di dì e di gnot…»
In Cjargne e à partecipât a tantis mostris: la plui impuartante, “Tra le pieghe della moda”, e je stade fate a palaç Frisacco di Tumieç, indulà che e à cognossût il mestri Pino Grasso, un ricamadôr che al fâs vistîts par Dolce e Gabbana, Armani e dutis chês grandis firmis.
Chiara e je di pocjis peraulis, ma a cjacarâ a son i siei vistîts curâts intal detai plui piçul. Cjalant al  doman, Chiara e dîs «O voi biel planc, passut dopo passut, ce che al sarà al sarà: no vûl fâ cjistiei di cjarte… ».
Par cui che al passone su internet, si pues lâ su YouTube e viodi lis sfiladis di mode di Chiara Banelli. ■
Marta Vezzi