CJARGNE. Un femine cjargnele cu la passion dal balon: l’arbitri Jessica Dusan Mecchia

«A pene che o rivi intun cjamp di balon, spes o sint dî “vuê o vin une femine. Ce vuelistu che e sepi une femine di balon.” La sezion di arbitris di Tumieç Paolo Ortis e je une des sezions che e à plui feminis.» Cussì e conte Jessica di Denemonç, di trê agns arbitri sui cjamps di balon dal Friûl e de Cjargne: «agns fa, il balon no mi plaseve, dopo tal 2011 o soi lade a viodi la Udinese e mi è vignût il balin. Pôc dopo, a scuele, a son stâts i rapresentants de associazion a fevelâ dal cors e jo in principi no pensavi di lâ: o jeri tant timide. Invezit, une mê amie e voleve lâ a viodi e mi à domandât di compagnâle. E cussì, o ai tacât. Dopo doi mês di cors o ai fat l’esam e o ai tacât a arbitrâ i giovanissimi (12 agns).»
Cuant che Jessica e à scomençât e veve 15 agns, cumò 18 e e arbitre lis partidis dal Carnico. «Il percors nol è tant sempliç. Tancj dal public a van dome a viodi l’arbitri, ma o soi usade a no sintî nissun cuant che o soi in cjamp. Forsit, la fadie plui grande par me e je chê di stâ daûr ai oms. O scuen simpri cori. Il zuiadôr cuant che al è strac si fâs cambiâ, l’arbitri no. O ai simpri di jessi lucide: intun secont o ai di valutâ e di decidi.» Ogni tant, intes partidis a son i osservadôrs che a controlin il lavôr dai arbitris. Se l’arbitri al è stât brâf, i vignarà dât un pont che al fâs medie. In base ae medie, la sezion e decît se alçâlu di categorie, fâlu restâ li o fâi fâ un pas indaûr.
In cont dal rispiet tai siei confronts, Jessica e rispuint «Dipent. Al è clâr che se un mi mande a chel paîs, lu mandi fûr. Mi è capitât chest an intune partide che o savevi za de presince in cheste scuadre di un pericolôs, e di fat mi à mandade a trai… Al è lât fûr, che ben si intint.»
Tai voi clârs di Jessica si lei une grande passion, soredut cuant che e dîs «O varai arbitrât cirche un centenâr di partidis, e gno pari e mê mari a vegnin simpri a viodimi. O soi contente, e plui int e ven a viodimi e plui o ai gust, e plui o sint l’impegn di arbitrâ il miôr pussibil.»
Ma tancj o pôcs a viodile, par Jessica nol cambie nuie: intai 90 minûts de partide, jê no viôt nissun, si concentre par dâ il miôr di se tant che femine, par meti in lûs la sô grande passion. ❚
✒ Marta Vezzi