Intes stradis cjargnelis e no dome, al pues sucedi di incuintrâ corieris cu la scrite MT Viaggi e cun al volant une biele femine bionde: chê zovine e podarès jessi Tania Muser. «Di piçule insù, o ai simpri vude la passion pe coriere. I miei mi àn mandade a fâ il liceu linguistic e, finidis lis superiôrs, o ai lavorât inte vedrearie di Zui par 14 agns. Cuant che o ai fate la patente de machine o volevi fâ ancje chê de coriere, e i miei mi àn dit “dulà vâstu?”. Mi àn simpri metût i bastons jenfri lis ruedis, fin cuant che une biele dì ur ai dit vonde e o ai decidût di fâ ce che mi plaseve. O ai fate la patente e dopo, ae fin dal 2008, o ai vierte la ativitât».
Vuê la dite MT Viaggi e svante un grup di 6 dipendents cun 4 corieris, un minibus di 19 puescj, un furgon di 9 puescj e une machine di 5. Si ocupe dal traspuart scolastic e turistic. In chest periodi e fâs servizi di skibus sul Çoncolan e, se al covente, ancje trasferiments in aeropuart «e dut ce che al capite», e dîs ridint Tania. «Ca di nô, al tocje adatâsi a fâ dut e daûr lis richiestis. Lis dificoltâts no mancjin, ancje pal fat che in chest setôr a son tantis ditis che a operin in chest teritori piçul e purtrop tra nô no je colaborazion. No si va dacuardi. A si zuie al ribàs pûr di puartâsi vie il lavôr. Jo, ultime rivade, o ai za vût ducj i controi, forsit cun chê di fâmi sierâ, ma mi è lade ben parcè che o ai dut in regule. Putrop al mancje il spirt di colaborazion che nus darès une man a lâ indevant cjapant sù ancje ditis plui grandis: o podaressin creâ un grup plui grant fasint un grum di plui, e invezit o sin a fâsi la vuere tra biâts. Nol è chest il sens. O ai cirût in dutis lis manieris di fâlu capî ma no soi rivade adore. Nô cjargnei o sin limitâts e o tignìn curât dome il nestri ortut. Achì in zone, il lavôr nol mancje e a ‘nd è par ducj! La Cjargne le viôt cun grancj potenziâi che purtrop a son fers. O vin puescj splendits e no sin bogns di sfrutâju. Ciert, tocje inventâsi alc par vivi e a saressin tantis robis di podê fâ. A son puescj li che a stan piês di nô a nivel di dut, e pûr a rivin a tirâ fûr risorsis che a nô no nus passin nancje pal cjâf. Chest, secont me, al è un pecjât!»
Ma di là di chest marum, Tania e je contente di vê podût fâ ce che fin di frute e veve tal cjâf e e dîs «Lu vessio fat prime! Si lavore tant: o soi impegnade 24 oris su 24, però la sodisfazion che tu âs no à presit. O dîs simpri che cun dutis lis oris che o fâs, o sarès siore a jessi une dipendente! Però no mi pese. Mi pesave di plui fâ un part time di 4 oris e mieze che no cumò lavorâ dì e gnot. Tu lu fâs par te e mi plâs tant!»
✒ Marta Vezzi
