Un esempli di ce che si fâs in Friûl
La foto 1 e je stade fate dongje dal Lât disore di Fusinis vie pe manifestazion clamade “No Borders Music Festival”. Si viôt part des struturis metudis impins par fâ i concierts e, in prin plan, a drete, un cartel. Il cartel al ripuarte ce che si viôt te foto 2.
Pôc lontan di dut il davoi fat sù pai concierts, a son altris cartei come chel de foto 3, che si cjate dongje de strade che e rive dal Lât disot.
◆ Achì al è indicât che si cjatisi dentri dal sît Natura 2000 “IT3320006 Conca di Fusine” e si specifiche che e je une aree istituide daûr de Diretive 92/43/CEE. Cheste diretive europeane e je peade ae conservazion dai habitats naturâi, seminaturâi e de flore e de faune salvadiis, e la sô finalitât e je chê di contribuî a vuardiâ la biodiversitât. Cence jentrâ in plui detais, intes areis istituidis ai sens de diretive si scuegnin adotâ lis misuris dal câs par evitâ il degrât dai habitats naturâi e dai habitats des speciis, e ancje la perturbazion des speciis che par chês lis areis a son stadis designadis.
◆ Cundiplui, intun altri cartel lì dongje si cite la “Valutazion di idoneitât al benstâ forestâl” tal ambit dai Lâts di Fusinis, dai “Servizis ecosistemics” gjenerâts de “Foresta Regionale di Fusine in Valromana”, in particolâr pes funzions “Turistichis e ricreativis” e pe “idoneitât al benstâ forestâl”, de “Gjestion forestâl sostignibile” e vie indevant, simpri cun cheste ande.
◆ Duncje, chescj cartei a dan a cui che ju lei la sensazion di jessi intun puest dulà che il rispiet pal ambient al è tignût intune considerazion alte e che, adiriture, e je stade istituide une aree propit par chel motîf.
Se, po dopo, si passe di chê altre bande de strade e dal parc pes machinis che si cjate dongje, al è il cartel de foto 2 dulà che da pît al è scrit: “Impensìnsi simpri che o sin ospits de nature, imparìn a rispietâle!”, cul pont esclamatîf ae fin par rimarcâ la impuartance de cuistion. In efiets, la cuistion e je impuartante, e je la plui impuartante stant che si trate di cui (o di ce, se si à miôr dî cussì) che nus à metûts su cheste tiere e che nus permet di vivi: la Nature (cul “N” grant) juste apont.
◆ Ma, se si cjale la foto 1, al è evident che al è alc che nol torne: i cartei a jemplin il cjâf palesant il rispiet pal ambient. Intant però dongje si met sù une sorte di robe dal gjenar propit su la rive di un dai elements ambientâi plui impuartants di dute la aree, par di plui intun sît Natura 2000! Schercìno?
No, no schercìn. Bisugne, cun di plui, considerâ che ce che si viôt inte foto al è nome une part di dute la cuistion, di fat a mancjin altris struturis, i tecnics e i mieçs che a coventin par fâlis sù e smontâlis, e lis personis che a rivin in numar alt te zone in ocasion dai concierts. Ancjemò, clâr che la foto no permet di fâ sintî dut il rumôr e, in gjenerâl, la confusion che a son sedi in ocasion des provis che dai concierts.
◆ A son, po dopo, altris aspiets de cuistion tant che, par esempli, il fat che i arbui che a son te zone des struturis a vegnin dispedâts a plasê dai organizadôrs dal festival daûr dai lôr bisugns. Chest al sucêt intun dai pôcs, se no tal unic bosc di rive di une cierte impuartance de Valcjanâl. E je ancje la frecuentazion de rive dal lât cun mieçs mecanics grues. Si podarès lâ ancjemò indevant ma si fermìn achì.
◆ Considerant nome i uciei, bisugne tignî iniment che i boscs di Fusinis a son un dai pôcs sîts in Italie dulà che e fâs il nît la Begarole dai Urâi Strix uralensis (che si viodi La Patrie, Dicembar dal 2020) e che, in plui di jê, a son diviersis altris speciis che cjapâts dentri te Zonte I de Diretive de Union Europeane 2009/147/CE che e tocje la conservazion dai uciei salvadis tant che speciis a prioritât di tutele, par esempli: Franculin Bonasa bonasia, Cedron Tetrao urogallus, Blausin des âfs Pernis apivorus, Pic grîs Picus canus, Pic neri Dryocopus martius e Pic dai trê dêts Picoides tridactylus (che si viodi La Patrie, Març dal 2021).
◆ La Nature, come simpri, nus dîs bielzà cemût che al va “tignût un lûc”: che si cjali la foto 5 (fate vie pal Istât, che al è chel stes dal festival sorenomenât), dulà che si viôt la aree dai concierts inagade e in sucession cu la rive dal lât. Chest al permet la continuitât dai rapuarts ecologjics des speciis fra rive e lât e al è esplicatîf di cuale che e je la situazion e di ce che si à di fâ (ven a stâi impedî altre antropizazion) e di ce che no si à di fâ (puartâ int a fâ “confusion”, par doprâ un eufemisim) pes finalitâts de Diretive 92/43/CEE.
Dut ce che al sucêt al è intune aree dulà che la protezion e la conservazion dai vivents e varès di jessi la prioritât.
◆ Duncje al è clâr che ce che a scrivin e nus contin a son sflocjis, stant che ancje un frut al pues capî che intune aree dal gjenar no si pues puartâ cheste sorte di manifestazions cence provocâ une alterazion dal sît. Chest, cun di plui, al fâs nassi une domande: ma se intun sît istituît inte suaze di une diretive europeane cun finalitâts conservativis si pues fâ ce che al è stât ripuartât, tes zonis che no jentrin in cheste sorte di “protezion” e che a son la plui part dal teritori, ce si puedial fâ? Butâ bombis?
Te zone prative dulà che la int si met par scoltâ i concierts e je stade metude ca e là cualchi plantute di Meless Sorbus aucuparia e Aiar Acer pseudoplatanus. Cuâl isal il sens di chest? Isal ancjemò par mostrâ che si interessisi al ambient plantant cuatri arbui (cui bêçs di ducj) intun puest dulà che, dal sigûr, no coventavin e dulà che il teren al ven sfracaiât (tal vêr sens de peraule) di miârs di personis?!?
◆ Dut chest al ven sostignût di afermazions che, par personis cuntun minim di percezion de realtât intindude inte sô completece, no àn sens o a figurin tant che pronunziadis di personis che no son in scuare ma che, in dì di vuê, a son acetadis di buine part de int. A coment dai concierts, di fat, si è sintût par esempli che “a son concierts unics pe part ambientâl e pe part naturalistiche” o che un dai complès che al à sunât lu à fat “in armonie cu la nature” o “intal massim rispiet pe nature” e v.i.. Al è evident che chestis a son afermazions che no vuelin dî nuie di concret, che a son di calcolâ propagande e che a chei sogjets alì ur interesse nome la musiche e il propri divertiment e tornecont, no sigûr la Nature.
◆ Intune situazion dal gjenar, dulà che l’ent public al va cuintri di ce che lui stes al previôt e dulà che l’interès al è pal cumierç (par es. a son metudis in mostre ancje machinis par jessi vendudis) e pai afârs, cemût si puedial pensâ di protezi e conservâ la biodiversitât che e je ae fonde des pussibilitâts dal om par podê mantignî un nivel di vite acetabil? ❚
