Cemût dâ une man

Cemût si fasial a judâ il comitât che si clame “Tutti per il Friuli”? La maniere plui semplice e je doprâ il computer, diretamentri online, discjamant il modul ae direzion internet http://www.tuttiperilfriuli.it e pandint cussì la adesion ae campagne referendarie. Il Comitât al è presint ancje su Facebook cuntune pagjine rivade za a passe 2500 “mi plâs”. In ducj i doi i sîts si precise che midiant di un regolâr referendum regjonâl propositîf si vûl rivâ ae istituzion des dôs provinciis autonomis di Friûl e Triest, ma ancje la individuazion di un tet ai compens dai aministradôrs dai ents locâi e societâts partecipadis.”Tancj dut câs nus àn mandât par pueste la lôr adesion” al conte Anzil, “e ogni dì mi clame o mi contate cualchidun”. Cui che al à voie di indreçâ la sô intenzion di adesion al Comitât al pues scrivi aes mails tuttiperilfriuli@gmail.com e mario.anzil@gmail.com o contatâ la sede dal comitât in vie Leopardi 9 a Rivignan Teôr. Lis primis adesions a son rivadis di esponents “storics” dal autonomisim furlan, come “pre Meni” Zannier, il Moviment Autonomist Furlan dal za president de Provincie di Udin Marzi di Strassolt, Identità e Innovazione e il Front Furlan. Ma a son tancj i singui citadins che a àn volût aderî: i ultins prin di lâ in stampe a son Lucio Peressi, mestri di gjenerazions di furlans e tra i fondadôrs dal Comitât pe Universitât, e Gotart Mitri. E la int interessade si sta moltiplicant.
“Par nô al è za positîf vê motis lis  aghis intal palût di un dibatit che cumò al sta tornant a dismovisi” al siere Anzil, no prin di spiegâ che “o vin altris iniziativis intal cjâf intai prossims mês. A partî dai bancuts tai marcjâts a iniziativis simbolichis par fâ fevelâ la comunitât furlane di chest teme. Une e podarès jessi ancje la propueste di fâ votâ in ducj i conseis comunâi dal Friûl un ordin dal dì che al pandi la adesion des Assembleis dai elets dai citadins a cheste idee. Tancj no lu cjaparan nancje in considerazion, ma in tancj municipis al podarès cjatâ bon acet. E alore sì, in chê volte, che il Palaç dai sorestants si rindarà cont che cheste no je une provocazion ma une idee politiche che e à mani e che e pues vê ancje i pîts par lâ indevant. Di bessole.” ❚
✒ W.T.