Celso Cescutti: la creativitât a brene vierte

Fra i tancj inovâi di chest an, si fâs ancje chel de muart di Celso Cescutti, nassût tal 1877 e muart tal 1966. Cescutti al è stât poete, studiôs, inventôr, viazadôr, naratôr. Al è un dai sîs poetis furlans che Pasolini al sielzè pe sô antologjie de poesie dialetâl dal Nûfcent, che al curà cun Mario Dell’Arco intal 1952 (chei altris a son Carletti, Naldini, De Gironcoli, Cantarutti e Pasolini stes). Pasolini no lu trate masse ben: lu viôt tant che un inleterât, scuasi analfabet. Ma cheste e je ancje la miôr cualitât di Argeo (pseudonim di Cescutti), che al è un poete di istint, inmediât, sclet, indotât di une fuarce espressive elementâr.
Di famee siore, Cescutti al podè diplomâsi gjeometre e vivi di rendite, dedicantsi aes ativitâts che plui i plasevin. Al jere om di grant inzen, autôrs di diviersis invenzions. La sô art poetiche par furlan le esprimè intai agns di zoventût. Intal 1911 al publicà il librut Primevere. Secjade la vene poetiche cu la prime vuere mondiâl, inte maturitât si limità a dâ dongje dutis lis poesiis che al veve scrit e a ordenâlis.
Apassionât di musiche e di cjant, al componè un grant numar di vilotis, romanzis, serenadis, imnis. Fra lis sôs cjartis ineditis al è dentri un Imni dai Ladins e dai Furlans.
A metât di Jugn a Flaiban lu an festegjât cun tantis iniziativis. Par cui che nol jere e pai curiôs di chest personaç, al reste il libri Robis di fruts. Poesiis di Celso Cescutti, che al met insiemi, in stampe anastatiche, i cuatri volums publicâts dal poete. Par vêlu, contatâ Comun o Pro loco di Flaiban. ❚
✒ Redazion