A Çurçuvint domenie ai 24 di Jugn, te fieste di Sant Zuan, e torne “Jerbas e tradision”. Si tacarà aes 10 di buinore cu la visite vuidade a une coltivazion di jerbis oficinâls e cu la viertidure di un marcjadut di prodots tipics e di ogjets di artesanât, par lâ indevant, di misdì, cun chê dai chioscs li che si podaran cerçâ plats cu lis jerbis. Aes 3 dopomisdì, si laran a cjapâ sù rosis e plantis par fâ il mac di Sant Zuan: un macet di tantis jerbis cun virtûts magjichis e terapeutichis, peadis al fat che, daûr di une crodince furlane une vore antighe, te gnot magjiche di Sant Zuan il cîl al fâs vignî jù une rosade che e à efiets straordenaris par oms e plantis. Aes 7 e mieze di sere, in glesie, al sarà il cjant dai jespui cu la Onorande Compagnie dai Cjantôrs e la benedizion dai macs di Sant Zuan.
E se o sês fantatis in etât di maridâsi, o podês provâ a fâ come che a fasevin chês di une volte, che la vilie de gnot di Sant Zuan a cjolevin une tace, une scudiele o une bocalete, le jemplavin di aghe fin a mieç e i metevin dentri un blanc di ûf. Po le poiavin sul barcon de cjamare o tal ort, par che e cjapàs la rosade (ma la prevision e funzione dome se no son ni aiar ni nui). Se il blanc dal ûf al somee a di une nâf cu lis sôs velis e cui siei arbui, al è bon segn. Cun di plui, la direzion de barcje e mostre ancje di ce bande che al rivarà il fantat di maridâ. Simpri che us pochi di savêlu! ❚
