CATALOGNE. Barça simpri plui catalan, e l’Udin plui furlan cuant?

Il Futbol Club Barcelona si conferme «Mas che un club» pai siei tifôs. Di chest an, di fat, la seconde maie de scuadre a puartarà il colôrs de “senyera”, la bandiere catalane a strichis zalis e rossis. Une robe mai sucedude fint cumò: i colôrs de bandiere a jerin sul golet de maie uficiâl o su la fasse di cjapitani, puartade ancje dal innomenât balonîr olandês Johan Cruyff tai agns ‘70, cun Franco ancjemò vîf.
Par dî la veretât il Barcelone nol è il prin a fâ buine cheste decision, ma si zontarà a Real Madrid, Valencia, Levante, Malaga e Athletic Bilbao: ducj club che a metin fûr te seconde maie i colôrs de lôr regjon.
L’an passât l’Udin al veve tant che maie di riserve chê di un zâl stîl “evidenziadôr”: si visaiso? Lady Pozzo e disè che a vevin cjapât spont di chês dal Barcelone, apont, che a jerin cussì l’an prin, e che i jerin plasudis tant. Bon, sperìn che ancje chest colp a cjapin sù l’esempli dai “blaugrana”, un esempli ben plui nobil e domandât di plui bandis dal popul blanc e neri furlan. Udineseblog.it – blog dedicât al Udin une vore seguît – da pît di un toc su la cuestion al siere cussì: «A Udin, intant, si domandisi cence rispueste cemût mai di agns no si rive a fâ une seconde maie blu e zale, come tai agns ‘80, che e riclami i colôrs dal Friûl». ■
Dree Venier