Cambiâ non par cambiâ la anime

“O ai cambiadis une vore di cjasis te mê vite, nevôt, che dome cui nons des stradis o podarès fâti une lezion di storie!” “Ce àno a ce fâ i nons des stradis cu la storie, barbe Vigji, e po, cuale storie, la tô?” “E je la storie de mê vite, di dulà che o soi lât a stâ, ma si incrose ben cu la storie dal Friûl e ancje de Italie”. “No rivi a capî. Contimi”.
◆”O soi nassût intune cjase in Piazza della Vittoria a Gurize. Sâstu di cuale vitorie che si fevele?” “Sigûr, de vitorie de prime vuere, cuant che o vin vinçût cuintri la Austrie Ongjarie, no mo?” “Magari cussì no. Ti conti cheste. Gno nono Indrì, che al sarès il to basavon e che si clamave come te, al à fate la vuere in Galizie cu la monture austriache. Cuant che al è tornât cjase, al à cjatade la tabele Piazza della Vittoria te place dulà che o jerin a stâ. Ce fote che i veve vignude sù! Al à tacât a sacraboltâ e a vosâ che chê place si jere simpri clamade Travnik o, massime par nô furlans, Place Grande. E che la vuere le vevin pierdude e no vinçude. E alore parcè tacâi non place de vitorie? Par coionânus?!”
◆”Beh barbe, chest al è un altri mût di contâ la storie!” “Ma al è chel just, parcè che al è vêr e vivût su la piel de int, no des fufignis! Gurize e jere stade 400 agns cu la Austrie e prime ancjemò contee infeudade dal patriarcje di Aquilee. Parcè jemplâle di stradis che a fevelin dai oms e des bataiis dai Savoia cuintri de Austrie come Cadorna, Diaz, Duca d’Aosta, Nazario Sauro, Fabio Filzi, Terza Armata, Generale Cascino, 24 Maggio, Brigata Casale, 9 Agosto, San Gabriele, Goffredo Mameli, fintremai une Via Balilla!” “Barbe, al somee propit che la Italie e ves vût voie di scancelâ ogni riferiment antîc par piturâ dut di vert, blanc e ros”. “Contile juste! Il so non vêr, Indrì, al è pulizie identitarie, doprant la propagande!” “O ai di dâti reson.”
◆”Cuant che o vevi siet agns o sin lâts a stâ in Piazza Umberto I a Udin, ma al à durât pôc. Dopo dal referendum e je rivade la republiche e e à scancelât il Re Buono, chel che al veve premiât il gjenerâl Bava Beccaris par vê tirât cui canons cuintri la int che e manifestave a Milan. Alore, cence cambiâ cjase, il nestri recapit al è deventât Piazza I Maggio, che nissun le clame place 1n di Mai parcè che ducj a doprin Zardin Grant.” “Bon, barbe Vigji, lis viis si justin daûr de storie dal moment”. “Eh no, nevôt, daûr di cui che al comande in chel moment!”
◆”Di fantat o soi lât a studiâ a Rome, che o vevin un cusin bonsignôr. O vevi cjatade une stanziute in centri, in Via dell’Amba Aradan, dongje di S. Zuan dal Lateran. Chel non al jere curiôs. A cjase la none, par dî che al jere un davoi, une confusion, e diseve propit ‘Achì al è dut dut un ambaradam’, ma no savevi parcè di chel mût di dî. A Rome o ai cirût di savê di plui e o ai scuviert che il non de vie al celebre un dai piês maçalizis fats dai talians in Etiopie. Tal 1936 par cuatri dîs la aviazion e i soldâts talians a vevin tirât cul gas (iprite, arsine e fosfagjen improibîts des convenzions internazionâls) intor dai soldâts e dai civîi etiops che a scjampavin dopo de bataie de mont (Amba) Aradan. Vevio di jessi content di jessi a stâ intune vie che e glorificave une copadice orende par concuistâ l’Imperi?” “Ma barbe, a jerin fassiscj, i varan tacât chel non par svant de bataie!” “Alore, tu âs di savê, nevôt, che dopo 80 agns di republiche, chê strade si clame ancjemò cussì!”
◆”A 25 agns o soi lât a vore a Milan. O jeri a stâ in Via Tripoli. Ma no dome. Dongje a saran stadis altris 50 viis che a celebravin lis concuistis coloniâls talianis: Tobruk, Bengasi, Massaua, Eritrea, Zuara, e vie indenant. Viale Etiopia mi faseve simpri pensâ a chei doi mil predis, diacuns e civîi torturâts e copâts di Graziani par rapresalie.” “Su chest o soi cun te, barbe. Vonde cun chê dai italiani brava gente!“
◆ Ore presint o soi a sta achì, a Cjarlins, in cheste strade che si clamave di secui Via dei Tonelli ma che un sindic dal ‘800 al à pensât ben di dedicâje a Giuseppe Garibaldi. Pense ce clâr che al jere une volte capî indulà lâ: la strade dai Tunei e jere lâ che e jere a stâ di secui cheste antighe famee dal paîs, invezit Garibaldis a ‘nd è in ogni comun. Come ancje, daûr de glesie, la andronute dal Furip e je deventade Via Camillo Benso conte di Cavour. Une robe fûr dal vade! E dopo la androne dal zûf (cussì nomenade pes fameis puaris che no vevin altri di mangjâ fûr dal ‘suf) si à cjapât il non de retoriche massoniche anticlericâl di Via XX Settembre.” “Barbe, tu âs reson, no i vevi pensât. Ce sens di comunitât, di storie e di memorie trasmetino chei nons? Al sarès di pensâ se al sedi il câs di scancelâ chês tabelis che no nus rapresentin o che nus àn imponût dome par fâ fûr la nestre identitât!”
◆”Cualchi sturnel al disarà che e je dome une tabele e che e sarès une stupidade. Jo o dîs che si à di pensâ ben a ce che rapresentin chês tabelis, ae storie dal non dal lûc e a cualis lenghis che si doprin te nestre tiere. No par nuie la prime robe che il Ream de Italie al à fat dopo vênus concuistâts e je stade chê di cambiâ i nons di lûc, des stradis, di tancj paîs e fintremai de int. E no lu àn fat dibant, ur coventave scancelâ secui di storie no taliane, convincinus che nô o jerin ducj fanatics dal ‘Risorgimento‘, platâ lis operazion di vuere di concuiste e esaltâ i erois de italianitât. Chês tabelis a son gotis di violence continuade cuintri de nestre identitât, une gote daûr chê altre e, planc a plan, nus glotin dal dut.”
◆”E alore, ce fâ, barbe Vigji?” “O crôt che no coventedi simpri butâ jù tabelis e monuments, come che a fasin chei de cancel culture, al bastarès vê cussience clare di ce che nus àn fat e parcè!”
◆”Mi ven iniment, barbe, chê sene dal film dulà che Totò e Peppino De Filippo a domandin al vigjil di Milan: ‘Vogliamo sapere, per andare dove dobbiamo andare, per dove dobbiamo andare? Sa, è una semplice informazione‘. Par lui e jere semplice ma, te sô batude par ridi, la domande no jere banâl. E mostre il paradòs di volêsi orientâ cence vê direzions, di cjalâ la nestre storie ma ancje chê di chei altris, de necessitât di confrontâsi par savê cui che si è e dulà che si à di lâ. Une ultime robe, Barbe. Parcè a Cjarlins no ise une Via Roma come in ducj i paîs talians?”
◆”O vin vût plui cûl che sintiment, Indrì. Tu sâs che il nestri antîc comun tal 1928 al è stât soprimût dal fassisim e zontât a chel di S. Zorç. Po ben, tal 1931 Mussolini al bute fûr une leç che ducj i comuns talians a vevin di vê une Via Roma, e che e sedi une vie impuartante. Il Comun di San Zorç, come ducj, pront al dediche ae capitâl la sô vie principâl. Cjarlins al jere cul Comun di S. Zorç e al è clâr che no podeve jessi plui di une Via Roma par ogni comun. Tal 1946, la prime robe che Cjarlins e brame e oten e je chê di tornâ comun autonom, che chel matrimoni cui parigjins (cussì o clamìn chei di S. Zorç) al jere stât dificil e cence amôr. Cussì la Via Roma se son tignude i sanzorzins e a nô e je restade la nestre Place S. Roc. Viodistu, Indrì, nol è mai un mâl che nol sedi ancje un ben!” ❚