Biadelore un monument al soldât austrofurlan, che al fâs un pôc justizie

Al sta su la roste dal Ausse, il flum che al segnave il confin. Di une bande la Austrie, di chê altre il Friûl. Al sta in vuaite: il soldât cu la sô baionete no si môf, sculpît intun clap di Aurisine. Cu lis mostacjis e il cjapiel asburgjic. Al ricuarde che di chel toc di Friûl, une volte Austrie, a partivin centenârs di zovins. Di paîs tant che Strassolt, Çarvignan, a lavin a sglonfâ lis filis dal Vincjesim setim e dal Novantesim setim Reziment, cun destinazion Galizie. Atenzion: reziment muc, no talian. Di sabide ai 14 di Mai, chel monument no plui «ai caduti», ma «al soldât austrofurlan» al testemonee il lôr sacrifici te Prime vuere mondiâl. Lu àn tirât sù a Çarvignan, chê volte austriache. Fîs obleâts a une patrie che no sintivin lôr, ma che ur tocjave di ubidî. In ogni comun di Italie si ricuardìn la vite dai miârs di zovins, “muarts par une Patrie”. Ducj si visìn di lôr: ma chei altris? Chei di là dal confin, si ben furlans? Lu volìno dî che a son simpri stâts ancje fîs dismenteâts: de lôr stesse int e dai trombons celebratîfs dal Centenari dal conflit, dal fint mît che simpri al compagne la Grande Vuere? Cussì, su chê piere, ancje la dediche e à il so sens: «Ai nestris soldâts dismenteâts», dongje de acuile di Cecco Beppe.
Dut al è scomençât tal Atom dal 2014. «La idee nus è vignude tant di une visite al Centri Skerk di Ternova di Aurisina. La esposizion e contave La grande guerra in casa, la memoria rimossa, chê dai soldâts dal K.u.K. Infanterie Regiment Freiherr von Walstatten. Furlans, ma sot la dominazion de Austrie Ongjarie», al dîs Marco Benes, president dal Comitât onorari par tirâ sù il monument. «Il mestri Skerk, in chê volte al jere ancjemò vîf, nus disè che al sarès stât biel ricuardâ chei zovins. Il scultôr Franco Sclauzero al restà incjantât di une imagjin dentri de mostre e al decidè che e podeve propite rapresentâ ben i nestris fantats. Pôc timp dopo, al comprà il clap di Aurisine e al sculpì chê imagjin». Po dopo, la opere e je stade donade ae comunitât di Çarvignan, par jessi colocade.
Cualchi probleme politic. Il sindic di Çarvignan al veve dât bon acet al progjet in mût calorôs. «Nus veve dade cjarte blancje», si vise Benes «Ma di traviers si è metût il consei comunâl. A  messint e je finide la politiche, ma a nô dal Comitât (componût in plui che di Benes e Sclauzero ancje di Gianpaolo Chendi) no nus interessave la politiche, nô o vevin chê di dâ il just ricognossiment a une vicende storiche che pôcs a cognossevin». Il tire e mole al larà indevant fin tal Fevrâr di chest an. «A un ciert pont nus vevin dite di sì, ma tal cimitieri, ma chest al voleve dî platâ il monument. Stant che chei altris muarts a àn za monuments dapardut, al jere just cjatâ un spazi specific a chescj nestris soldâts, che il Stât talian nol sa nuie di lôr».
Al progjet dal comitât, si son zontadis diviersis associazions locâls. «Propite par vie che a vevin capît lis nestris intenzions», al sclarìs Benes. Amîs de Schwarzes kreuz Austriache cul president Franco Stacul; Associazion Mitteleuropa cul president Paolo Petiziol; Associazion Terre sul confine, cul president Ferruccio Tassin; Associazion Natiso cum Turro cul president Gianluca Comar; Associazion Cormons-Austria cul president Giovanni Battista Panzera. E po i storics: Todero, Perini, Grimami e Milocco.
E cussì il Comitât – e o sin a Mai 2015 – al invie lis tratativis par che la opare e cjati la juste colocazion dentri dal comun. Al tire sù un miâr di firmis. E al menace: o intun puest decent o si done il clap a Dael e Flumisel, ben contents di dâ acet al monument te lôr place. La cjosse e devente un câs e e divît la comunitât. Il Comitât al reste fer. Par rivâ ai prins mês di chest an, cuant che si cjate un acuardi. La roste dal flum, dulà che al passave une volte il confin. Di là Austrie-Ongjarie, di ca Friûl. ❚
____________________________
I prins doi muarts furlans
I prins doi muarts de Grande vuere a jerin doi furlans. Ducj o savìn dal alpin di Udin, Riccardo Giusto, muart sul Kolovrat cul esercit talian. Pôcs, o nissun, si visin che, forsit ancje prime di Giusto, al murì il soldât Eugenio Sandrigo, di Aquilee, cogo, ma tal esercit austriac. I prins doi soldâts muarts inte inutile stragje a jerin doi furlans, si ben su fronts diviers. Cheste cundizion di soldâts furlans, ma cun monturis diviersis, si spieghe cul confin che al divideve la Basse. In comun di Tor di Zuin, localitât Trê Puints, e je ancjemò la piere che e segne il confin: une linie che e va sù fintremai a Visc. Çarvignan, Strassolt, cu la Austrie; ‘Sevean cul Friûl. Fintremai ai 24 di Mai dal 1915, cuant che a rivarin i soldâts talians. ❚
✒ Oscar Puntel