Benedets i nestris muarts

Novembar al è te tradizion cristiane il mês li che cun plui afiet e fede, insiemi, come paîs, o ricuardìn i nestris muarts. Al sarès miôr dî: “o ricuardavin”, par vie che lis usancis de glesie di cualchi desene di agns indaûr a stan colant o a son za coladis. Ancje la solenitât dai Sants e la zornade dai muarts si cjatin te routine dal mont di vuê, tal “dâi une smorseade e scjampe” che insiemi al individualisim esasperât, al afan par une vite sistemade e ae ilusion-delusion di risolvi dut cence une spiritualitât e cence Diu, a fasin progredî la umanitât a cessecûl ancje tal nestri Friûl.
◆ Pe societât di vuê il paradîs cristian nol esist; si fermisi al spot finâl dal Halloween e al paradîs dai farcs sot tiere.
In chest mês di ricuarts, o vin tal cûr ancje i nestris muarts di Glesie Furlane: chês personis che ogni an o nomenìn o ancje no nomenìn te messe dai sants Macôr e Fortunât a Aquilee.
◆ Vuê, sielzint fra ducj e cence mancjâ di rispiet a di nissun, o vuei fâ une polse dongje di pre Pauli Varut, predi fra i pionîrs dal nestri grup. Lu ricuardi par vie che al jere nassût te fieste de Madone de salût tant cjare ae nestre int: ai 21 di Novembar dal 1943. Ordenât predi ai 8 di Avost dal 1967, al sarès muart a nancje 42 agns ai 20 di Zenâr dal 1985.
◆ Di lui o podìn cjatâ alc di scrit tal libri di pre Antoni Beline: “Pre Checo Placerean, Notis par une biografie”, Arts Grafichis Furlanis 1997. Al è un libri che ducj o fasaressin ben a leilu, par vie che al trate dal Friûl dai agns fra i ‘50 e i ’90 dal secul passât: agns sflandorôs, epics te storie de nestre int.
Di pre Pauli no conti des cualitâts che al veve, de sô spiritualitât fra vanzeli e int, de passion pal nestri popul, dal tignî dongje i predis malsestâts e, par sedi sclets, de sô sfortunade cariere diocesane a gjambar vie. Mi fermi invezit un moment aes ultimis setemanis de sô vite e il motîf al è chest: devant dal so Calvari, amîs e contraris (indi veve!) ducj a àn scugnût sbassâ il cjâf e ricognossi la disposizion umane e la profonde spiritualitât di chest om.
◆ Tal ospedâl di Udin a vignivin a cjatâlu personis di ogni fate ma ancje puare int di nissun valôr, scartade te societât par ben di vuê. Une dì e jere capitade une biade femine ma lis visitis a jerin stadis canceladis; jê si è fermade te sale e e à spietât dut un dopodimisdì pûr di viodilu un moment. Il gno pinsîr al va cumò a une manifestazion di taramotâts. O jerin a Udin, al svintave aiar, al ploveve a selis e si jerin riparâts sot de loze dal Lionel; tal davoi, une femine malcuinçade e cjaminave disint a fuart: “Don Paolo padre dei deboli e rifugio dei tribolati”.
◆ Di fat, chest al jere pre Pauli: tant al saveve presentâsi cun dignitât e cjacarâ cul President de Republiche e tant si infogave tal difindi il plui starlocj dal paîs.
Il tumôr i veve supât dut il cuarp e dome a passâi la piel cuntune man lizere si sgrisulave; par zirâlu tal jet tocjave jessi in cuatri, cjapâ i pics dal linzûl e movilu a planc a planc.
◆ Tal repart, ducj i volevin un ben de anime e, se cualchidun fra infermîrs e miedis al veve di cjapâ flât tai burlaçs de vite, al leve li di lui; lui tal colm de sô burascje al rivave ancjemò a consolâ, a dâ sperance e coragjo. Come che al dîs S. Pauli: Benedet seial Diu, che nus confuarte in ogni nestre tribulazion par che o podìn confuartâ chei che si cjatin in ogni sorte di tribulazions cun chel confuart che ancje nô o vin di Diu (Cfr. 2 Cor 1, 3-4).
Propit cussì.
◆ Il Signôr i veve mandât doi agnui a cerclâlu di ogni cure e afiet: pre Pauli Tofolet e sûr Antonia. Pre Pauli al jere rivât de Americhe latine e Varut tal so bon cûr lu veve lozât in canoniche a Vasinis li che altris predis si jerin cjatâts come di famee.
◆ Sûr Antonia e viveve cun sûr Fides tes barachis dai taramotâts a Bordan. E sarès muarte cualchi an dopo, tal ’94, tun ospedâl di Innsbruck, in Austrie, li che si cjatave par un tumôr te piel. Cumò e fâs tiere sante, simpri benvolude e dongje di pre Pauli tal cimitieri di Bordan.
◆ Ma, mi tocje sierâ il spinel des memoriis… e o tornìn subit ai nestris muarts: chei di Glesie Furlane e chei dal nestri cûr.
Ogni tant, cuant che te gnot o cjali il cîl pontât di stelis, o pensi che i defonts a son come chei lusoruts e a iluminin ancjemò dal alt lis scuretâts de nestre vite; ancjemò nus son dongje, e cui sants e i grancj benefatôrs de umanitât, nus compagnin, nus protezin e o sin peâts a lôr tune rêt di energjiis spirituâls che no cedin. Cualchidun al disarà: “matetâts”, ma tropis matetâts e fantasiis antighis no sono dopo miârs o milions di agns deventadis veris? Il nestri mestri Jesù nus à prometût: O voi a preparâus un puest e al zonte: Pai oms chest nol è pussibil, ma par Diu dut al è pussibil (Zn 14, 2; Mt 19, 26). Al è ce che il cûr di ognidun di nô al sint e al spiete; ce che l’amôr al da conferme. ❚