“La Patrie dal Friûl” e je un gjornâl, il gjornâl dai furlans che no si rindin. Ma e je ancje une farie di dibatit, di discussion, di savê. Par chest la Clape culturâl che e edite chest gjornâl e à sielt intai ultins agns di publicâ ancje dai libris che a van daûr de nestre maniere di viodi il Friûl. Al inizi o vin fat discuti cu “La cuintristorie de prime vuere mondiâl” di Agnul Floramo: po a son vignûts i “Patriarcjis fûr dal ordenari” di Diego Navarria. Chescj doi amîs de “Patrie” a son ancje i autôrs di doi tescj che a van a insiorâ une vere e proprie golaine che o vin clamât “La machine dal timp”.
◆ Ai 13 di Otubar o presentarìn ae Librarie Tarantola “Patriarcjis tal cûr de Europe” di Diego Navarria, che al rione ducj i scrits de sô rubriche dal 2021. Ai 2 di Novembar, invezit, intal inovâl esat de muart di Pier Pauli Pasolini, o jessarìn cun “Anime in crôs” libri che al met insiemi un dialic imagjinari jenfri pre Toni Beline e Agnul Floramo sul poete di Cjasarse. Doi libris di no pierdi. ❚
Beline e Floramo, dialic su Pasolini. Navarria e i “Patriarcjis tal cûr de Europe”
Redazion
